Giovedì, 27 Gennaio 2022 - 16:00 Comunicato 208

Traduzione in cimbro
Online di websait vodar naüng didjitàl TV in Trentino

In månat von hornung bartnda bèksln di frequentzan åhevante von kamöündar auz nå in konfì un dena nå un nå alle di åndarn

Da naüge didjitàl TV rift in Trentino. ’Z izta online von menta 24 hoachnach www.trentinoinrete.it/TVdigitale, di websait boda di trentinar mang vennen di datum, di lentar bosen ågeat un alle di naüng nå un nå azpe sa auzkhemmen vo bia ’z bèkslnda di frequentzan (refarming). Nå in progråmm von Ministèr vor di Bichtschaft (Mise) heftma å atz 4 un atz 8 von hornung pinn kamöündar vo Bondone un Vermiglio, atz 14 pittar obar Val di Non un an toal vodar Val di Sole un dena von 15 sin atz 23 von hornung pinn gåntz Trentino. Sin haüt dar refarming von frequentzan iz ågånt dar Sardegna, Valle d’Aosta an toal von Piemonte un vodar Lombardia.
Studio televisivo [ @Mise]

14 djar dòpo in earst switch off – ’z djar 2009 hatta gemacht verte di zait vodar televisiong analogesch un hatta ågeheft da sèll didjitàl – est ’z djar 2022 da didjitàl televisiong boroatetze zo bèksla an åndra bòtta, ’z klhinta inngevüart da hoach definitziong.

Dar Ministèr vor di Bichtschaft (Mise) hatt detzidart ke von 15 sin atz 23 bartnda khearn z’soina auzgètt di frequentzan vor di televisiongen. Zoa zo legase pittnåndar pinn Redjongen un Provìntzan nidar nåmp in zèrte lentar bartz khemmen getånt pellar: atz 4 von hornung in Kamòu vo Bondone in Valle Chiese affon konfì pittar Lombardia; atz 8 von hornung in Kamòu vo Vermiglio (obar Val di Sole, hèrta affon konfì pittar Lombardia) un atz 14 von hornung in da obar Val di Non un toal vodar Val di Sole pittnåndar pitt zèrte lentar von Südtirol.

Da naüge websait vor di trentinar

In Trentino, di websait zo halta kunt iz www.trentinoinrete.it/TVdigitale, augelekk vodar gesèllschaft Trentino Digitale. In di sektziong boda iz lai vor da didjitàl TV vo Trentino in rete venntma di skede von zen tang boda bartn khemmen bidar auzgetoalt di frequentzan. Aniaglana skeda hatt drau di Kamöündar bosen ågeat, di mappa vo boda rift dar senjàl, di bichtegarsten informatziongen un nützlege meldung. In di earstn zial di websait lekk vür in kontator von Kamöündar boda in månat von hornung khemmen getroff von refarming von frequentzan.

Afta rècht vodar sait didjitàl televisiong, di pürgar mang seng an video tutorial un di nümmar bo åzorüava zo bizzasan mearar.

Peng disan naüng modo zuarzogeba di frequentzan di trentinar pürgar mochan khearn zo süacha di kanél afte televisong, lånt vor lånt nå un nå asó azpe sa khemmen inngevånk in tage boz khint gebèkslt (spet abas odar padar nacht).

Vor schiar alle di televisiongen di kanél khemmen gesüacht lai in automatisch. Azta anvétze di televisiong hatt nèt disan sistèm, bartma mochan süachan di kanèl alumma.

Da natzionàl websait iz da sèll von Ministèr vor di Bichtschaft (Mise) https://nuovatvdigitale.mise.gov.it.

Di åndarn date vodar didjìtal TV

Atz 8 von lentz barta khemmen ågenump in gåntz Beleschlånt dar naüge kòditze zo trasmettra MPEG-4 da hoach definitziong, haltante hèrta in standard vo est DVB-T

Disan stroach o iz pezzar khearn zo süacha alle di kanél.

Von earst tage von hoachnach 2023 da belese televisiong bart ånemmen vor hèrta in standard DVB-T2. Alle di natzionàl kanél boda khemmen gesek pin codec Mpeg-2 bartn mochan soin darlescht vor da auz iz ’z djar 2022, un berda nèt hatt a televisiong odar in decoder boda pazzt bartze nemear mang seng.

Zo schupfa åzonemma di naüng standard un zo vornaügra di altn televisör dar Ministèr hatt vürgelekk zboa statàl schütz: dar Bonus TV – Decoder un dar Bonus Rottamazione TV.

Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)

(cdt)


Immagini