En general guat organisiarn de zait va òrbet ont de privatn dinger ist hòrt ver mearer sòchen, abia de vil stunnen za òrbetn, de turni, s austoaln de òrbet as secks oder sim ta as de boch ont de bèrken as sai’ za vil starr. Zbischn de autonome òrbeter ist der 81% as ist “zavrin” keing en 86% van u’stelltn òrbeter. Noch de zaitn va òrbet, vil vòrt lenker, a toal figurn miasn gor òrbetn en de stunnen va vrai’, abia as men sicht ver de viarer ont ver de specialisiaretn òrbeter. Abia kein, zbischn de sektorn pet mear problemen ist de lònschòft, de haiser/birthaiser ont transport/magaziniar (men geat van 77% asn 83%), do muast men vil mear zait òrbetn. De òrbetn en finanzsektor, ont de sèlln va de òllgamoa’òrbet (nou mear en de schual), as minder bècksleg ont mear sicher sai’, sai’ de sèlln as pesser tsechen sai’ en oa’negea’ zbischn òrbet ont privatlem (range zbischn 88% ont 89%).
Zan leistn sok der Speziali: “De dinger as arauskemmen van studium zoachen as de baiber òrbetn u’nemmen pet minder stunnen, asou za meing mear zait hom ver za plaim pet de familia. Ver dòs men miast aupasn za verstea’ s zavri’n sai’ van baiber, avai s ist vilvert an nokemmen van na song en òrbetmoglechkaitn va vil baiber”.
Abia kuntschòft va de moglechkait za verpessern s oa’negea’ lem-òrbet, s sai’ drai guata modeln van lender zoacht kemmen: Patrizia Pace ver en Trentin hòt vourstellt der òllgamoa’-privat dinstsistem, ont hòt unterstraicht s ekosistem lem-òrbet ver en summer. Michael Wörzer ver en Tirol hòt vourstellt abia as gòngen ist pet en konkurs “bèrkn mear family friendly”, Christa Ladurner va Familienagentur des Landes en Sudtirol hòt vourstellt abia as naia noschaungmodeln trong meing en an pesser austoal van familieòrbetn zbischn de eltern. Barbara Gerstenberger, vourstea’ner va de fondazion Eurofond va Dublino, hòt u’gariaft en nai riaf iber en oa’negea’ zbischn òrbet ont familia ver de eltern as noat hom va òcht, mosnemm u’ganommen van Europeische Rot en prochet van 2019. Der trèff ist moderiart kemmen van Viarer IPL Stefan Perini.
Men mu sechen der gònze studium online af de sait https://www.agenzialavoro.tn.it .
Ver za hom mear nochrichtn men mu schraim en de viareren van Studiumomt van Mòrkpolitik va de òrbet Isabella Speziali (isabella.speziali@provincia.tn.it) oder en Corrado Rattin (corrado.rattin@provincia.tn.it).
Òll vinf jor de Europeische Fondazion ver de qualitet va de òrbet (Eurofond) pet en sitz en Dublino, mòcht an untersuach iber en abia as men òrbetet (EWCS) en 36 europeischen Stòttn. Bidervourstellt ver en Euregio en 2021 turch 4500 telefonvrogn gamòcht en Tirol, Sudtirol ont Trentin de gip de moglechkait za verglaichern òlla de òrbettschichter untertschuacht en de drai lender. Der doi projekt, zolt ont unterstitzt van Euregio, gip de moglechkait en de Partnerinstitutn za vertiavern de temen iber en abia as men òrbetet en an iata macroregion. Der studium Euregio EWCS bart bidervourstellt kemmen en Innsbruck af de 20 van òlderhaileng 2023. Do bart vourstellt kemmen sèll as arauskemmen ist va de untersuach iber en tema van òrbetklima, as drinn hòt de òrbetluft zbischn de mitòrbeter, s oa’negea’ avn òrbetplòtz ont s vertrauen zbischn de u’stelltn ont de viarer.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
