Traduzione in ladino
Nef ospedèl de Fiem, Fascia e Cembra, se à beleche serà su la istrutoria tecnica
L president se à scontrà coi aministradores. L ejam del Navip l é belebon inant, se speta la responetes del proponent su la mudazions domanèdes
La istrutoria del Navip (Grop de valutazion e verifica di investimenc publics de la Provinzia) su la proponeta de partenariat publich privat per l Nef Ospedèl de Fiem, Fascia e Cembra la é beleche fenida. Te la setemènes che vegn se speta che rue la responetes de la firma poponenta su la domanes de mudazion portèdes dant dal organism tecnich, mudazions per cheles che se se à confrontà per n muie de setemènes. Se chesta mudazions les vegnarà toutes su, sarà possibol serèr su con ejit positif la istrutoria en relazion ai perfii del equilibrie economich finanzièl che serf. Col parer a favor del Navip, l dossier l ruarà sun desch de la Jonta provinzièla che la podarà declarèr l enteres publich de l’opera. Se trata de n passaje che darà l met de envièr via l iter urbanistich, ambientèl e tecnich sul nef ospedèl che se perveit de fèr su a Masi de Ciavaleis e – element dassen emportant per l’Aministrazion provinzièla – l percors de partezipazion e de scout di teritories, che podarà aer n ejit positif o negatif. Chest l é chel che à deschiarì l President de la Provinzia autonoma de Trent endèna la scontrèda stata te auditorium de la Cassa Rurèla de Fiem a Tieser coi aministradores de Fiem, de Fascia e de Cembra, te chela che l é stat fat na valutazion generèla sui agiornamenc do da l’ultima scontrèda stata de jené.
Coi ombolc de la trei valèdes, coi raprejentanc de la Comunitèdes de val de Fiem e Cembra e del Comun General de Fascia, estra che coi parlamentères e conseieres provinzièi, l President de la Provinzia l à recordà l empegn che se à tout su l’Aministrazion provinzièla te la scontrèda stata de jené de envièr via n percors che l sie partezipà più che l é meso e che respeta i raporc coi teritories.
À cognù passèr dut chest trat de temp, à dit amò l president con apede l diretor generèl de la Provinzia Paolo Nicoletti, i sorastanc Luciano Martorano, Roberto Andreatta, Antonio Tita, per poder fèr fora i problemes entravegnui ti desvalives ambic de la istrutoria per poder conscidrèr en dut e per dut la proponeta de partenariat portèda dant.
L president à recordà ence che l finanziament che enlouta l era stat stanzià per l ospedèl de Ciavaleis l é amò e l restarà a la leta scin canche no vegnarà tout la dezijion finèla. I investimenc su la strutura sanitèra de ades i vegnarà amò fac, descheche à arsegurà tant l President che Antonio Ferro, diretor generèl de la Azienda sanitèra.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
(cdt)
Immagini
