Dòpo in groaz erfolg von 2025, bartma machan haür o di bèrkstattn vor di khindarn von 6 atti 12 djar, boda bartnse haltn in dritte såntzta von månat vo madjo fin in herbestmånat di 10.30 in Museo. Durch praktische un lustege aktivitétn, berda nimp toal bart mang khennen bazta vorporget di natùr, pitt soin roasan un vichar: Pittar “Misióng zo übarleba” sebar bida di vichar bèksln zo übarleba in di umbèlt un pitt “An tage vo piage” sebar bisa lem dise khlummane insèkte. Pittn trèff “Haüt flattartma” bartma mang khennen pezzar di vögl, bia sa lem un bazza tüan un pittn trèff “Di kraft von èlbarn un von gegés” bartma darvérn bia ’z tüanda di èlbar un ’z gegrés åzopazza dar umbèlt bo sa lem.
Zoa zo reda vodar umbèlt an såntzta 13 von prachant, an såntzta 18 von höbiat un an såntzta 8 von snitt bartnse o haltn drai abas-trèff in setz von Kulturinstitut Lusérn. In earst trèff, boda bart hoazan “Untar dar roge”, bartma ren vo bia dar bòstriko iz nå zo macha bèksln ünsarne beldar. Balbaraz bartn vennen in höbiat, anvétze, barpar ren von pern, schaugante o å pittnåndar khurtze video. In månat vo snitt, pittn lest trèff boda bart hoazan “Nèt lai stille”, barpar süachan zo vorstìana bia ’z tüanda zo vorstìanase di vögl von balt.
Pitt dise trèff o, dar Musèo Lusérn geat hèrta vürsnen auzohalta da bizzkultùr un zo macha khennen pezzar da ünsar earde un di umbèlt bo bar lem alln in laüt un in khindarn boda zuarkhemmen.
Di bèrkhstattn vor di khindar von 6 atti 12 djar bartnse haltn atz 16 von madjo, atz 20 von prachant, atz 18 von höbiat, atz 15 von snitt, atz 19 von herbestmånat un atz 17 von bimmat: zo nemma toal mochtmase innschraim un an eltarz mentsch mocht nåkhemmen in khinn; ’z izta nicht z’zala. Atz 2 von madjo, atz 13 von prachant, atz 4 von höbiat, atz 8 von snitt, atz 5 von herbestmånat un atz 31 von bimmat bartnse haltn durchgevüarte trèff in musèo; vor dise o, zoa zo nemma toal, izta nicht z’zala.
Zo vorsa eppaz mearar atti trèff bodase bartn haltn un zo bizza bia zo tüana innzoschraibase, tüat gian atti websait www.lusern.it odar atti social von Musèo Lusérn; ma mage o schraim a mail att info@lusern.it odar årüavan in nummar 0464-789645.
Übarsetzt von Kulturinstitut Lusérn
