“Chesta normativa, aproèda acà 25 egn, l’à segnà n passaje storich per l recognosciment e l
stravardament de la 12 mendranzes linguistiches che l é sul tegnir talian, portan strumenc concrec per la valorisazion de n patrimonie culturèl unich – l à dit l assessor regionèl a la mendranzes linguistiches Luca Guglielmi - Noscia Region l é n model da esportèr tel ciamp del stravardament de la mendranzes linguistiches.
L augurie l é che duta l’autra realtèdes les posse emparèr dut chel che aon fat e fajon te chisc egn percheche chest patrimonie culturèl l posse seghitèr a viver e no a soraviver”.
Chesta neva realtà vel esser n pènt anter istituzions e sociazions locales, col ge recognoscer n post fondamentèl a duc chi che se dèsc ju per l stravardament di lengac de mendranza – l à dit te sie intervent la diretora del Istitut Cultural Ladin »Majon di Fascegn« Sabrina Rasom – la Sociazion la se met dant de renforzèr la cooperazion anter la comunanzes linguistiches, portèr inant projec culturèi e educatives per la valorisazion di lengac de mendranza e sostegnir scomenzadives inovatives che tol ite ence tecnologìes digitèles e de la tradizion linguistica.
Cree che sie na gran ocajion percheche nosc teritorie l à la fortuna de aer strumenc che i è de utol per stravardèr la desvalivanza linguistica – l’à jontà ite la Rasom – e l é noscia responsabilità conspartir noscia esperienza vardan de didèr chela mendranzes sul tegnir talian che no à noscia medema fortuna”.
Chesta sociazion la é emportanta percheche la ge dèsc na spenta al coordenament de duta la mendranzes linguistiches taliènes – l à sotrissà Tore Cubeddo diretor Ejatv Cagliari – e la sporc l’ocajion de fèr n nef percors dessema e più pervalif te la azions da meter a jir sul teritorie”.
La nasciuda de la Sociazion Articol 6 l é n vèrech emportant envers na maor sensibilisazion e empegn coletif per l patrimonie linguistich talian – l à sotrissà Leo Virgili, President de la Sociazion Inniò e promotor del SUNS Europe – Te n contest olache i lengac de mendranza risia de vegnir desmentié, la sociazion la vel aer n ruol atif tel ge garantir la trasmiscion a la generazions del davegnir.
(Ofize stampa Region Autonoma Trentin-Südtirol)
Traduzion di Servijes Linguistics e Culturèi del Comun general de Fascia
