Na chèrta per chi che à amancol 65 egn con su 3.600 euro per comprèr prodoc de prum besegn te boteighes e speziaries convenzionèdes
Nasc la Carta Argento Trentino
Traduzione in ladino
[Ladino] Na dotazion de 3.600 euro per finanzièr la compres de prum besegn da pèrt de la persones de amancol 65 egn che ciapa la pèrt A del assegn unich provinzièl. L é la Carta Argento Trentino aproèda en vender 19 de dezember da la Jonta provinzièla e portèda dant dal vizepresident Achille Spinelli che l à proponet la delibera per meter en esser l projet. “Se trata de na mesura sperimentèla che se jonta apede la perferida de scomenzadives metudes en doura da la Jonta provinzièla per didèr la families e i sentadins, soraldut chi che vadagna de manco e donca i risia de più l'esclujion sozièla –la paroles del vizepresident -. Te chisc ultimes egn l cost de la vita do e do più aut l à smendrà debel la capazità jà pera de comprèr de chesta fascia de popolazion. Scichedonca con chest strument volon smaorèr la dotazion del Assegn Unich Provizièl, col sporjer n didament da poder durèr sobito per comprèr bens de prum besegn”.
Con chesta mesura donca vegn dat fora, una tantum e sorafora la pèrt A, n didament economich a favor de la families che les ciapa jà l AUP – pèrt A e che les abie requisic spezifics.
L didament l é recognosciù desche n credit de la suma de 3.600,00 euro en dut, da poder durèr dai benefizières o da sie enciarié tras la Carta Argento Trentino (C.a.T.) per comprèr bens te la boteighes e te la speziaries acreditèdes.
Via per la setemènes che vegn la Provinzia la binarà su la partezipazion de la boteighes e dapodò la dajarà fora la chèrta a chi che à derit, che per la ciapèr i podarà se oujer ai ofizies periferics provinzièi.
L'intervista al vizepresident Spinelli
I retrac
Traduzion di Servijes Linguistics e Culturèi del Comun general de Fascia
(cdt)
Immagini
