De bichtestn naiekaitn hòlltn inn:
- Kursn ver za riarn se turch chatbot: s ist kemmen zuagaleik an videokurs regiart pet de sòchen za tea’ ver an iatn tragettrimester. S material paroatet zòmm pet de augea’hèlver, baiberdoktern, kinesiologen ont pet de fisiater ist kemmen u’ganommen van Operativunitet Riabilitativ va de APSS. Men derklort as, ver de baiber notschauk van krònkendinst muater-fetal pet hoa pferlechkait oder pet faktorn ausònder pfèrlech kimmps rotet za hearn an professionist vour za vongen u’ an iata òrbetn.
- Kurs va mikrolearning asn èssn: de App bart derzua sai’ en de kurz u’lear, gamòcht turch chatbot asn èssn bail as men traget ist. De doi u’lear ist gamòcht va mearer video as tauern bea’ne minutn ont derno kurza quiz ver za kemmen tschatzt. S innhòlt ist kemmen notschauk va augea’hèlver, baiberdoktern, ont nutrizionistn ont u’ganommen van Dietetik Dinst ont Klinische Dietetische Klinik va de APSS.
- News Kanal: s ist kemmen derzua galeik an nain klòffkanal direkt as de haupsait va de App.
- Der doi mittl bart gahasse nochrichtn gem en de lait as de naiekaitn va TreC Mamma ont bart meing kemmen praucht va auskenneta lait ver za long kennen de augea’kursn, de zòmmtrèffen oder òndra nochrichtn as mechetn nutzn en de baiber ont en de sai’na familie.
De baiber as schoa’ prauchen de App barn sa lai miasn vernaiern, de sèlln as hom sa nou nèt oarganommen barn vinnen de naiekaitn bail der earste prauch derno za hom sa austellt.
De leiste naiekait keart en de zavri’vrogkòrt a’ne nu’m as de mame barn vinnen as de home page va TreC Mamma. De zait ver za villn aus de vrogkòrt ist ungefèr va zeichen minutn, de ist runt bichte ver za hom an feedback van sèlln as prauchen de App ont abia as de funzioniart asou za meing se òlbe verpessern. De vrogkòrt bart offet plaim finz as de 30 van leistagest 2025.
De doin vernaierung derstelln an tritt envire en de digitalndinstn as kearn en de tsunthait mama-kinn en Trentin, de versterchern de òrbet va de APSS pet de zòmmòrbet va TS4.0 ver za kennen gem mittln òlbe mear gilte ont laicht za prauchen.
De App TreC Mamma
Men kònnt en prauchen schoa’ va de òchta van agest 2023, der TreC Mamma hòt omport gem en de neat van sèlln as barn kemmen mame en an multidiziplinar vurm. De datn tschazt lòng sechen as de sèlln as prauchen sa sai’ vroa: òll to 550 baiber untersuachen de applicazion ver za schaung der klender van trèffen as de hom ont de nochrichtn van bòcksn van kinn ont de bècksln as kearn derbail as men envire geat.
Datn van virm as praucht kimmp:
- As hait de trentinische baiber as hom oarganommen de App sai’ en 4.804 pet a mittlèlt va 32 jor.
- Der 12,5% ist derstellt van baiber as kemmen van auslònt. Ver en 56% van baiber ist s earste kinn, ver en 31,5% ist s zboate kinn ont ver de sèlln as plaim (12,5%) ist s dritte oder s viarte kinn.
- De App kimmp oarganommen zan mearestn as balsch (99.5%), ober men konnt hom as englesh ont as franzesisch aa.
- De mittlèlt va de tragetzait va benn as de baiber oarnemmen de App ist as de draizente bòch va benn as men traget ist.
- De nochrichtn as drinn sai’ en de App sai’ kemmen tschauk ver 14.000 vert en de leistn secks mu’netn, ver 28.783 en leiste jor ont mear abia 43.000 vert va benn as de ist en de leistn zboa jor.
Zbischn de vertiaven mear tschauk vinn ber de trèffen bail de tragetzait, de zoachen as prauchen a gahassega untersuach ont de nochrichtn as kearn en de earstn drai mu’netn va benn as men traget ist.
De App, derzua en de naiekaitn as sai’ kurz gamòcht kemmen, gip de moglechkait za hom vil dinstn ont praich, abia:
- Schaung de trèffen CUP: de personal nochrichtn van baiber, as men drinn leik bail as men innschraip se, de sai’ u’gahenk en informativsistem va de Apss ont de gem de moglechkait za sechen de trèffen va follow-up as men ganommen hòt turch der Cup (oa’zegeu’mèllnse sistem) va de Tsunthaitbèrk.
- Kontrolliarn de tragetzait: an klender as drauschauk boch ver boch benns bòckst s kinn ont de bècksln as kearn de mama, ont s gip rèchta rotn ver òll zait.
- Innhòltn zertifiziart: kennen nochrichtn studiart va auskenneta lait va de Provinzalbèrk ver de tsunthaitdinstn as gea’ va de laibtsunthait as de sèll psikologische, ont as omport gem en de vrong as hom de baiber bail de doi ausònder zait van lem ont as gem rèchta rotn.
- A tragetopuach: gèltsgott en beil de mama mu’ auschraim de nochrichtn, de dokumentn ont de pilder as de bill as kemmen gadenkt.
- Learmittln gem turch a virtualhilf (chatbot GEA): artikln, video ont zoachnenzeitler as bichtega sòchen as kearn de tsunthait bail de tragetzait, plaim guat va kopf ont paroatn se ver en moment as augeat s kinn.
- Link en de Hilfcommunity: an virtualplòtz bou as de mame meing vinnen sèll as de prauchen ont toaln de sòchen ont vinnen a zòmmhilf.
S kimmp envire trong der prauch va de App va de augea’hèlver en òlla de earstn trèffn van augea’be. An ausòndra òcht ist kemmen gem en de inlusivitet: de App TreC Mamma ist moglech as drai sprochen (balsch, englesh ont as franzesisch), ver za versichern as òlla de mame as kemmen van auslònt ont as inntschrim sai’ en provinzal tsunthaitdinst kennen s prauchen, ont s bart bòcksn ont vergreasern de moglechkaitn ont nostea’ en de baiber ont en de familia bail de schea’ zait va de tragetzait ont en kemmen mama ont tata, pet en zil za gem a rèchta ont personlich hilf.
S verpesser va de App TreC Mamma mòcht toal van an projekt “Digitaltsunthait ont artificial tschaikait - Mittln ver za verglaimern der Tsunthaitdinst en de lait ont en verpesser van provinzalsistem”, u’ganommen pet ausrot va de Provinzaljunta va de 22 van schantònderer 2022 , bou as vour ist s Derretn ver de “Earstn tausnt to van lem”. Der zil ist der sèll za mòchen ont u’nemmen a zòmmòrbet va digitaltsunthait ver za stea’ no ont hèlven s baib, s kinn ont de familia za plaim guat ont mòchen prauchen rèchta virm va lem ver en psikologische guat stea’.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
