L’inaudazion de la mostra - co la prejentazion del catalogh de na selezion de la fotografies metudes fora - la sarà en mèrtesc ai 11 de mèrz da les 5 domarena aló da la teraza del bar Al Fassa Coop, a Sèn Jan, olache i curadores menarà chi che arà gust te na vijita compagnèda a la desvaliva espojizions.
“A chi che se domana la rajon de chest projet te nosc zenter comerzièl me sà bel ge recordèr la miscion che l Fassa Coop à semper portà inant e valorisà, che l é apontin se dèr ju per l teritorie e per la comunanza, con vèrda particolèra al mondo culturèl e identitèr de chesta comunanza linguistica picola ma feruscola”, spiega l diretor Luca Giongo.
“L titol de la regoeta “Nos-etres” ge dèsc lèrga a desvaliva interpretazions: nos apede i etres, nos etres te na sozietà turistica averta a neves lengac, cultures e identitèdes e nos dessema col mondo economich parejentà te chesta ocajion da la Coprativa de Fascia, semper averta a la colaborazion te la ativitèdes del Istitut e del Museo Ladin e a chela che volon ge sporjer n gran bel detelpai”, recorda la diretora del Istitut Sabrina Rasom.
Cartes de vijite l é ence n projet fotografich più gran endrezà fora per l 2023-2024 dal Istitut Cultural Ladin “majon di fascegn” dal fotograf Davide Baldrati e che l tol ispirazion da la fotografia del Otcent e di prumes del Nefcent, con chela de conservèr la memoria de anchecondì per la generazions che vegnarà do. E per chesta conservazion l é stat cernù l papier stampà “che fosc l vegnarà mingol śal - recorda l forograf - ma l restarà entriech e scempie, desche n fossil, desche n stamp marcà sun n sfoi”.
