De ausrot as ist kemmen u’ganomment shauk en artikl 61-bis van provinzalgasetz 21/1992 (Regln ver de provinzalprojektn ver de Laichter vonenpau), innganommen van provinzalgasetz va stabilitet 2026: en doi artikl hòt s a naieket, as ist ver za zuazoln de òrbetn ver za ausrichtn de haiser za zinsn enviretrong va lait. S doi billt song as men gip an paitrog en konto kapital gor ver privatn as billn ausrichtn sainega haiser ont gem en zins en lait as hom noat van a haus.
Pe de doi mosnemm kemmen tschrim de kritern, ber as mu’ ont abia kriang der paitrog.
Ber kònnt vourstelln a vrog
De vroger miasn hom a haus, gor o’toalt, en de eirter va de Provinz va Trea’t.
Òrbetn as men kònnt vrong der paitrog
De òrbetn va ausrichtn miasn kostn nèt minder as 15.000 euro ont nèt mear as 50.000 euro ver an iats haus. Benn as sai’ garift de òrbetn, de haiser barn miasn drinn sai’ en de katastalkategori van A/2 finz en A/7.
Biavle as bart sai’ der paitrog ont nou òndra zuazoln
Der paitrog ist gem en konto kapitale ont ist der 50% van kost as konnt sai’ innganommen. Der kònnt sai’ mear ver òndra 5.000 euro ver an iats haus en de doin vòlln:
- Benn s der vroger mòcht se hèlven van innrichtn as nèt verea’n as òrbetn ver za hèlven de lait as hom noat van a haus, oder gemen de haiser as sai’ kemmen ausgarichtet;
- Benn s haus as kimmp ausgarichtn kimmp nea’mer gem en zins ver a kurza zait.
Abia as kemmen tschèrllt de lait as gea’ drinn en zins
Ver za tschernen de lait as noat hom van a haus za verzinsn, de sèlln as kriang der paitrog hom zboa moglechkaitn:
- Direkt tschèrl: de sèlln as kriang der paitrog meing sèlber tschernen de lait as nemmen en zins. De doin miasn nèt pauer sai’ van a haus as steat as minder abia 40 kilometre vèrr van sèll as de tea’ verzinsn;
- Tschèrl durch de innrichtn as nèt verdea’n; en doi vòll, de sèlln as kriang der paitrog meing vrong hilf en de dinsnt as kemmen gem van innrichtn as nèt gabingen ont as òrbetn ver za hèlven de lait as noat hom, asou za meing gem de haiser as sai’ kemmen ausgarichtet.
Ver en sèll as keart der zins, en de zòmmpint barts kemmen ganidert van 15% der zins asou abia as paschraip de ausrot va de Provinzaljunta n. 1060 va de 10 van heibeger 2026.
Zaitn ver za vourstelln de vrong
De vrong ver za kriang der paitrog barn kemmen vourstellt va de 24 van agest 2026 finz as de 12 van schanmikeal 2026.
Der paitrog bart kemmen gem no en de zaitn as kemmen vourstellt de vrong finz benn as men hòt ganua gèlt.
Ver en zuazol van vrong va paitrog, de Provinz va Trea’t hòt vort galeik ver en 2026, 5 milionen va euro.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
