Di arbat S-136 “geredegarn un betarn in provintziàl bege 133 von Laaz – toal 1 un 2” trakk vür di åndarn arbatn boda sa soin khent gemacht vodar Aministratziong aftn bege vo Monterùf, di lestn soinse gemacht verte ’z djar 2023 un håm geredegart in bege zbisnen in km 6,6 un in km 6,8 (arbat S-891). Di solutziong, gevuntet pittnåndar pinn lånt emtar lekk vür zo macha an uantzegen naüng tunnel in gianan nidarbart , haltante, anvétze, di zboa stòregen stöll zo giana lai in aubart, asó gloabetma az saibe destrar viazarn übarhaup pan summar balda iz mearar trafiko. Di arbatn soin khent zuargètt in an khnopf firmen bodase spoin gelekk panåndar ’z soinz: di CASAROTTO SPA vo Strigno (TN) (khnopfvüarar) un di IPOGEO SRL vo Seren del Grappa, boda håm inngètt mindrante in 6,008% opfrante in gåntzan åna sicharom 7.846.483,16 euro, drinn pitt allz bazta ågeat dar sicharom khintz zo khosta 8.081.983,16 euro. Di zaitn zo macha verte di arbatn soin khent geschètzt in 560 tang nå un nå.
Dar zboate toal (in gåntzan 168 tage arbat) servìrt zo macha verte zo richta in provintziàl bege 133 sichrante di kreutzung zuar Folgrait un Lavròu.
Da naüge umkhear boda bart khemmen gemacht atz Monterùf hatt azpe zil daz sèll zo macha mearar sichar di kreutzung zbisnen in provintziàl bege 133 un in stattbege 349 (boda vüart zuar Lavròu un Folgrait odar zuar Lusérn odar Slege). Dise arbatn soin khent zuargètt dar firma Zortea srl vo Castelnuovo boda hatt ingètt mindrante von 7,426%, in gåntzan 858.565,10 euro vo disan 833.165,10 euro vor di arbatn un 25.400,00 euro vor bazta ågeat dar sicharom.
RUP: diridjént von Dianst vor di arbatn afte beng un afte aisanpån – inz. Carlo Benigni.
Übarsetzt von Schaltarle vor di zung von Toalkamou vodar Zimbar Hoachebene
