Te Fascia, la mostra su De Gasperi vel recordèr a na vida sorida e piajegola la istoria de chest statist, protagonist del destin di popui de noscia region, e ge meter apede n auter picol tassel: n retrat del veie restorant “Marmolata” (ades “Maria”) sun Pordoi ti egn Vint, autografà da De Gasperi del 1952, canche l é stat te chesta ostaria veiora. “Cherdon che chest document unich, che per solit fèsc bela parbuda te Rifugio Maria, l passenee delvers con i sentimenc fons e dal cher fora, porté dant da la mostra e soraldut l se conjobie con un di retrac metui fora, che moscia De Gasperi sun Pian de Schiavaneis che ge vèrda su maraveà al Sela” declarea la Presidenta del Istitut Cultural Ladin e del Museo Ladin de Fascia, Tea Dezulian, che à podù aprijièr l projet dantfora e l’à volù l portèr te val.
La meticolousa selezion di scric de De Gasperi met al luster sia idees pojèdes sui valores democratics più fons e su na vijion de la politica vivuda desche na miscion, ma tel medemo temp la lascia vegnir fora duta la emozions di evenc personèi, vedui te sia viesta da ogne dì.
Duc i tesć de la mostra i é a la leta tras qr-code per todesch, per ingleis o ence dic su a ousc, acioche posse se emprevaler l publich più gran.
N excursus dai colores vives te la vita de n om, dant dal dut, segnà da sie picoi recorc de canche l era bez e joenet, de la noza, di viajes e di momenc de paussa passé con chi de cèsa sa mont, ma che tel medemo temp fèsc vegnir fora ence sia fermeza tel ge jir do a sie obietives e l met amò miec al luster na fegura de gran respet, benvoluda e tegnuda da duc desche model de bona politica, de ferstont e de gran anteveder.
La Mostra “Alcide De Gasperi. Album di casa” restarà orida te Cèsa de Comun de Cianacei dai 15 de jugn ai 7 de messèl 2025, duc i dis da les 8.30 a les 12.30 e da les 15.00 a les 19.00; dai 30 de jugn l orarie sarà fora e fora da les 8.30 a les 19.00; l’entrèda la é debant.
