Traduzione in ladino
L Trentin sul podie ai Jeghes Arge Alp de bal sui feres a Varese
[Ladino] N bel resultat per l Trentin ai Jeghes Arge Alp de bal sui feres, stac a la fin de la setemèna passèda a Acinque Ice Arena de Varese. Te la classifica generèla, apontin la squadra trentina la é ruèda tel terzo post del podie, do da la Lombardia e da la Baviera che les à tout pèrt con n numer maor de atlec te la desvaliva categories.
Al event à tout pèrt presciapech 140 joegn balarins sui fères en raprejentanza di diesc raions de Arge Alp, duc engaissé da la voa de portèr inant l sport, la sostenibilità e la cultura alpina te la colaborazion sorafora i confins.
I 19 atlec trentins, compagné da la autoritèdes e dai tecnics del Comitat Trentin de la Federazion Talièna Sport de la Giacia, i à raprejentà con gran suzes la Provinzia autonoma de Trent te la categories Juniores Under 19, Joegn Under 16, Under 14 e Under 12.
I balarins sui feres i fajea pèrt de la sozietèdes Circolo Pattinatori Artistici Trento, Sporting Ghiaccio Artistico Pinzolo, Fiemme On Ice, Val di Fassa Artistico Ghiaccio e Artistico Ghiaccio Fiemme.
Estra che la garejèdes sportives, tel program l era ite ativitèdes culturèles per i joegn che tolea pèrt, desche na vijita a un sit storich. A la fin de la garejèdes, l é stat endrezà na festa olache l é stat menà la bandieres de duta la regions Arge Alp che tolea pèrt.
Chiò se pel troèr i resultac e la classifica finèla: https://www.argealp-sport.org/it/inverno.html
Arge Alp l é na Comunità de lurier metuda su ai 12 de otober del 1972 a Mösern, tel Tirol, col obietif de ge fèr front e sostegnir i besegnes de duc i raions alpins e che tol ite 26 milions de jent. I membres de Arge Alp l é la Germania col Stat de Baviera, l'Austria coi Länder Vorarlberg, Tirolo e Salisburgo, la Tèlia co la Provinzies autonomes de Busan e Trent e la Region Lombardia, la Svizra coi Ciantons di Grischun, San Gallo e Ticino.
Traduzion di Servijes Linguistics e Culturèi del Comun general de Fascia
(cdt)
Immagini
