Dar progråmm nidarzolega in planung vor daz naüge krånkhhaus hatt ågeheft innvångante vor earst di lentar interesàrt machantese nemmen toal – a fase boda hatt inngehaltet von bintmånat 2024 sin in hornung 2025 – pinn zil zo höara bazmen impaitet un bo zo machaz.
Dar metodo boda iz khent genützt, untarstraichta dar Gottardi, hatt soin hauppunkt in da sèll boda khint khött “zirkolàr gesunthait” (boda haltet kunt vo allz daz sèll boda ågeat in prodjèkt un iz gest o dar fokus von gåntz protzèss nidarzolega in plånung boda innhaltet di fase zo macha nemmen toal di pürgar o) un iz in groazan gåntzan darkhennen 32 kritèrdje bia zo venna in djüst platz, kritèrdje boda haltn kunt von sèll boda iz auzkhent von laüt. ’Z iz a metodo boda zuargitt in lentar zo venna in peste platz, ankunto in ploaz date augenump, in analisi un allz daz sèll boda iz khent gemacht, un iz a sperimentatziong boda bart soin ’z zuarkhemmen vodar trentinar plånung, gegruntet aftz vèrt un ziln un nèt azpez iz haüt.
Dar vèrt zo haba gevuntet in groazan gåntzan in platz, übarlekta dar asesór, opfart in Toalkamòu vo Fiemme an metodo boda iz guat zo lega panåndar mearare sachandarn boda ågian in an krånkhhaus, sanitér, sotzio-ekonomege, infrastrukturàln, urbanistìk un vor bazta ågeat dar auzseng un dar umbèlt o. “Zo zornìra in djüst platz - machta verte zo khöda dar asesór – bartma mochan haltn kunt o vo bazta pensàrn di laüt un alle di sèlln boda in an modo odar in an åndarn soin inngevånk. Vor daz sèll iz nèt genumma a prodjèkt un an platz bo auzomachaz, ma ’z izta mångl an “pakt” boda mocht stian drinn in lånt plån un boda mocht soin da djüst kornìs".
Est geatma vürsnen pittar fase boma bart machan bizzan in pürgar bazta iz khent vorgelekk un baz ma bart mochan tüan nå dar strategesche umbèlteg schètzung, pinn zil zo riva in bintsche zait aftn zboate tritt in da provintziàl Djunta boda bart mochan ånemmen in platz in groazan gåntzan zornìrt.
Dena alle di briavan bartn khemmen inngètt in Toalkamòu von Fiemme tal zoa åzoheva da lest fase da sèll zo venna in djüst platz vor daz naüge krånkhhaus, dena bartma mang åhevan da operatìf fase pittn prodjèkte un auzomacha da naüge sanitér infrastruktùr.
Übarsetzt von Schaltarle vor di zung von Toalkamou vodar Zimbar Hoachebene
