Traduzione in cimbro

Kanél aftz taütsch vo ORF 1 un ORF Sport, est makmase seng in Palai o

[Cimbro] Da provintziàl Djunta, vorgelekk von vorsitzar Maurizio Fugatti, hatt ågenump un dena zuargètt in dianst zo zoaga di trasmisiongen von taütschan kanél ORF 1 un ORF Sport, sterchrante in senjàl zoa azza mang khemmen gesek pittnar hoachan qualitét in da gåntz provìntz. Disa oportunitét khint möglich nå in prodjèkt boda zuargitt zo macha khennen mearar da taütsch zung in di lentar boda ångrentzan pinn Österraich, asó azpe in Südtiról un iz khent vürgetrakk auz pan långez vo haür.
In Trentino dar prodjèkt zo lazza seng di trasmisiongen in da taütsch zung iz gepuntet pittar schützung von taütschan zungmindarhaitn zimbar un möknar, ma dar geat å alln in åndarn pürgar o.
Dòpo z’soinase gevuntet un zo habada lång draugeredet pitt Ei Towers, di gesèllschaft boda hatt di vertretung, saitma est gelånk zo haba un guatn senjàl in Palai o (pinn sèll impiånto gehoazt Lenzi) ummaz von lentar boda lebet da möknar kamòuschaft boda sin haüt iz gestånt auzgehakht .
In di bochan boda khemmen barta khemmen vorpezzart dar dianst zuargètt un bartnda khemmen gevorst di kanél in Minister bosen zuarsteat. Di trasmisiongen bartn mang khemmen gesek von earst månat von djar boda khint 2025.