Derno van an vourbourtmoment en beil as de viareren van Sprochminderhaitndinst Elisabetta Sovilla ont der verlaichter Rocco Scolozzi vourstellt hom de grunto’nung van projekt ont der vurm as praucht kimmp za unterstitzn de kreativitet van jungen, s bourt ist gòngen prope en sei, a gruppe va ladiner, bersntoler ont zimber jungen as bail en earste trèff va schanmikeal u’ganommen hom za nemmen toal en zòmm-aupaun va komunikazionstrategian ver de jungen, as u’gaglichen sai’ en de o’nungen, neat ont vourbòrtn van jungen sèlber.
No en vurm gahoasn “visioning” as tschbinnt vour an òrbet va voursechen moglecha zukunftn as va òlla gabellt sai’, en de toalnemmer ist pfrok kemmen za stelln se vour as “de komunikazion aupaut en 2024, no 5 jarder va runt guata naikaitn, trong hòt en sòchen asou guat za hom kriak der Prais Pan-alpino 2030 ver de Interlinguistik Zòmmòrbet”.
Sai’na vourtschbinnen hom se boret gamòcht en drai projektvourschlogn as schoa’ van titl verstea’ mòchen de sensibilitet ont de kreativkròft van òrbetgruppn: “Ponte-Bridge”, ver a intergenerazionalpruck ont zbischn de minderhaitbèlt ont nèt, “Cunst-C1st” (an beirterspil zbischn s ladiner bourt “bravura” ont s taitsch bourt “Kunst -Arte”) pet vourtschbinnen va naia virm za òrbetn ver de kunst ont de kultur, ont zan leistn “Nos Drai J” (bichtega beirter ver de drai sprochen, as zòmmhengen en puachstòmm “J” as en bourt “jungen” aa drinn ist) no en an gaist va interlinguistik zòmmòrbet ver za paun a virtualgamoa’schòft as zòmmòrbetn mòcht de sèlln as vèrr aa lem.
S ist glaich abia as gea’ barn de dinger va de doi naiekait, oa’n van riven as men se vourtschlong hòt ist schoa’ pòckt kemmen: unterstitzn s zòmmtrèffen se van jungen van drai lender va gschichtlega sprochminderhaitn van Trentin ont mòchen en verstea’ der ausònder bèrt as hòt hearn se toal va de doin gamoa’schòftn, asou za bècksln sa en richtega mittln va de aigene sproch ont lokal kultur.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
