Chi che viaja con Yoalin i podarà fèr rei e se confrontèr en ocajion del event de scomenz del projet, dai 14 ai 16 de jugn a Poschiavo (Svizra) e te desvaliva scontrèdes ti teritories da mont. Amò apede i vegnarà engaissé a tor ju sia esperienzes tras foto e diaries de viac, dajan coscita sie contribut atif al projet.
I contribuc miores i vegnarà premié te n concors, de chel che l event finèl l sarà dai 24 ai 26 de otober del 2025 a Berna. Diesc partezipanc de la regions de Arge Alp i arà amò apede l met de portèr dant sia esperienza al Forum anuèl Eusalp ai 25 de november del 2025 a Dispruch.
I partezipanc i podara ciapèr consees de utol per sie viac da la comunità de ex viajadores de Yoalin, a la leta desche compagnadores o compagnes de raida te vèlch region, estra che aer a la leta informazions sul sit https://www.yoalin.org/.
Yoalin l é na scomenzadiva de la CIPRIA – Comiscion Internazionèla per la Stravardament de la Èlpes e de sie Consei consultif di joegn, che l é do a vegnir metù en doura dal 2018. Estra che Arge Alp, l projet l vegn sostegnù
da la pèrt de la Convenzion de la Èlpes te la Svizra e Austria e da la Fondazion Clima Now. Arge Alp l à jà tout pèrt al projet del 2021 e del 2022. L event de scomenz de Yoalin l é stat fat a Landeck tel 2022, tel chèder del 50° cedean de Arge Alp, endèna la presidenza tiroleisa.
Arge Alp l é na Comunità de lurier metuda a jir ai 12 de otober del 1972 a Mösern, tel Tirol, col obietif de ge fèr front a e sostegnir besegnes comuns di raions da mont e che la tol ite presciapech 26 milions de jent. I membres de Arge Alp l é la Germania col Stat de la Baviera, l’Austria coi Länder Vorarlberg, Tirol e Salzburg, la Tèlia co la Provinzies autonomes de Busan e de Trent e la Region Lombardia, la Svizra coi Ciantons Grischun, Son Gagl e Tessìn.
Enjontà: l placat
Traduzion di Servijes Linguistics e Culturèi del Comun general de Fascia
