Di delibera ågenump vüart vür in artìkl 61 bis von provintziàl gesetz 21/1992 (disziplìn von provintziàl hilfan vor bazta ågeat di haüsar zo leba) inngevüart von provintziàl stabilitét gesetz 2026: disar artìkl lekk vür untarzolega an groazan toal gèlt vor arbatn auzzorichta haüsar pinn zil z’soina vorzist un gemacht vo natürliche Person, nèt vo firmen un asó baz. Ditza billz soin genuant ke dar schütz mage khemmen zuargètt in privètt pürgar boda bölln auzrichtn haüsar dar soinen zo geba zo zis in laüt bodasan håm mångl.
Pitt disan provedimént khemmenda auzgemacht di kritèrie, baztada iz mångl un bia åzovorsa in schütz.
Ber ’z magda inngem in vorsch
Berda åvorst mocht soin padrù, vonan toal o, vonan gehaüs in di provìntz vo Tria.
Baz ma mage åvorsan zo macha
Di arbatn auzzorichta mochan vürleng z’zera daz mindarste 15.000 euro un daz mearste 50.000 vor aniaglan quartìaro. Verte di arbatn di quartìarn mochan gehöarn in katastàln kategorìan vo A/2 atz A/7.
Biavl ’z iz dar schütz un åndre hilfan darzuar
Dar schütz zuargètt in konto kapitàl iz dar 50% von sèll boda khint zuargètt z’zera. Dar mage khemmen gekreschart vo 5.000 euro vor aniaglan quartìaro in dise kase:
- Azta berda åvorst machtze helvan vo emtar boda nèt håm azpe zil in gebinn boda arbatn zo süacha an quartìaro in laüt bodasan håm mångl odar boda nèt vennen an quartìaro, odar lekk a disposiztziong garade vo disan in quartìaro;
- Azta dar quartìaro auzgerichtet khemm nemear gètt zo zis vor khurtza zait.
Bia zo venna di di laüt boda håm mångl
Zo venna di laüt boda håm mångl vonan quartìaro zo leba, berda hatt gevånk zuargètt in schütz, mage tüan in zboa mode:
Vennen garade sèlbart bem zo vorzisa in quartìaro. Di sèlln bodaren khint gètt zo zis mang nèt soin padrü vonan åndarn quartìaro drinn in rånt vo viartzekh kilòmetre von sèll boden khint gètt zo zis;
- Senonda mangsa süachan epparummaz pittar hilfe vo emtar boda nèt håm azpe zil in gebinn un boda arbatn zo helva in laüt boda håm mångl an quartìaro, odar boden nèt vennen opfrante quartìarn auzgerichtet o.
- Vor bazta ågeat in zis, dar kontràtt bart khemmen gemacht mindrante in 15% von sèll boz berat dar zis vo merkà asó azpe da auzmacht di delibera vodar provintziàl Djunta n. 1060 von 10 von höbiat 2026.
Zaitn innzogeba in vorsch
Di vorsch zo haba in schütz mang khemmen inngètt åhevante von 24 von snitt un sin atz 12 von bimmat 2026.
Dar schütz bart khemmen zuargètt nå un nå azpe da bartn khemmen inngètt di vorsch un sin azta bart soin gèlt.
Auzzala di schütz boda bartn khemmen ågevorst, di Provìntz vo Tria hatt untargelekk vorz djar 2026 in gåntzan 5 mildjü euro.
Übarsetzt von Schaltarle vor di zung von Toalkamou vodar Zimbar Hoachebene
