Lunedì, 09 Novembre 2026 - 13:30 Comunicato 3369

Set cores, passa doicent ciantores e nef ciantia neves ansera sun paladina del Teater Navalge a Moena per l projet de la “Majon di Fascegn”.
Gran bon ejit a Moena per l conzert finèl de “TrasLaMusega – Ciantèr fascian”

Traduzione in ladino

[Ladino] N teater pien e rès e na aiegra aria de festa ge à fat da cornisc, ansera, te Teater Navalge a Moena, al event finèl de “TrasLaMusega - Ciantèr fascian”. L projet, portà inant dal Istitut Cultural Ladin “Majon di Fascegn” anter i evenc per festejèr sie cincanta egn de atività, l é nasciù da n grop de musegonc, raprejentanc del mond de la musega e pascioné, chiamà ite dal Istitut ladin a la fin del 2024: enlouta l é vegnù fora che fossa de besegn de smaorèr l’arpejon corala locala con neva e originèla compojizions ladines.
Embendapò, sun paladina se à passà l testamonech ben set gropes de ciantores che à tout su la endesfida perferida da la Majon di fascegn a scomenz del an. I se à outà ite la mènies e i se à metù a compor musega neves sun tesć ladins. I passa doicent ciantores de chisc set gropes à viventà coscita n conzert segur dinamich e desvalif, ciantan nef toc inedic pissé su mesura per ic, anter ejecuzions a più oujes o con compagnament de strument, che à tocià duta la èmenes de la coralità fascèna, da la tradizion populèra de la ciantia da mont, a la polifonia mista, dai cores de gejia a la ousc biences.
Chesta scomenzadiva à abù l sostegn de la Region Autonoma Trentin-Alto Adige/Südtirol, la colaborazion del Comun de Moena che à metù a la leta l teater e del Comun General de Fascia che à metù l projet te sie Pian organich de politica linguistica e culturèla, per uzèr fora l valor del lurier fat dai cores al ben del corpus canoro ladin.
[ Istituto culturale ladino]

A verjer l conzert l é stat l Cor Sènc Piere e Paul da Soraga con “Recordame” musegà da Andy Rossi, su la poesia omonima de Danilo Dezulian del Garber, e “A Sènta Zezilia” (musega de Andy Rossi e Michele Pellegrin su test de Michele Pellegrin). Do l é stat l moment zevil del Cor di bec de la Scola de Musega “Il Pentagramma” de Fiem e Fascia, protagonist de “La steila” e de “La bolp e l geber”, de Ilario Defrancesco per la museghes e de Stefano Dell’Antonio per la paroles. La musega da gejia à fat amò sia bela parbuda col Cor de gejia da Ciampedel che à ciantà “Tu t'es Segnoredie” (musega de Stefano Lazzer, test de Stefano Lazzer e Stefano Dell’Antonio), do se à scutà su l Coro Nosc col toch “Bon star”, paroles e notes scrites da Peter Decrestina. Se é jic inant co la armonies del Cor de gejia da Vich, che à fat scutèr su “Orazion scempia” (musega de Fiorenzo Brigadoi su la paroles de la “Preghiera semplice” traslatèdes e adatèdes da Rosanna March), per do scutèr la melodies tipiches da mont del Cor Valfassa con “Maridete pura” (musega dei Stefano Lazzer, test de Stefano Lazzer e Stefano Dell’Antonio). À serà su chesta levina de sons e notes la  polifonica Ensemble Canticum Novum, che à portà dant n brano articolà te trei moments, dal titol “Vegn dì” (musega de Ilario Defrancesco sun test de Stefano Dell’Antonio).

 L é stat tout ite ence l publich te chesta scomenzadiva, ajache l é stat envià a palesèr sia preferenzes per la cianties che ge à piajù de più e a recognoscer l lurier di autores di tesć originèi, dut chest te n clima de amicizia e de confront anter realtà musicales che à abù l met de se cognoscer e fèr pèrt de na unica festa.

A la fin, la trei cianties più aprejièdes l é stat aboncont “Maridete pura”, “La bolp e l geber” e “Vegn dì”.

“Chest projet à confermà amo n’outa che la musega bina a una pascioné de ogne età e gust musical – à dit Daniela Brovadan, responsabola de la scomenzadiva – e durèr l lengaz ladin l é stat na vertola deldut trefèda per ge dèr gaissa e foja a la creatività ladina dal dì d’anché, jerveèda sun reijes identitères sènes e vives. Ma l merit ge va zenz’auter ai cores che se à dat ju con pascion e competenza”.

L rebom de la scomenzadiva no l se destudarà sobito do l conzert. Per lascèr fora chesta arpejon musicala giusta nasciuda, dut l corpus de la partidures e la registrazions de la cianties vegnarà metù bele prest sul sit de la Majon di Fascegn e su la Mediateca Ladina, acioche sie sorì da ge ruèr apede da man de gropes e formazions, sibie da chiò e magari ence da fora de val. 

(pc)


Immagini