Atz Ronchi vo Ala dar tage hatt ågeheft pittar miss khött von Don Alessio Pellegrin, dena håmda geschozzt di trombìn vo San Bortolo a folk kulturàl feroine von Draitza kamöündar. Un iz gest pròpio di nempum zbisnen Trentino un Veneto, un übarhaup zbisnen in zimbarn lentar dar tèma von vairta, ’z iztada o gest, defàtte, dar pürgermaistar vo Brunge in Balt, Marco Cappelletti. Di identitét, baz ditza bill soin gemuant, dar vèrt vodar zimbar zungmindarhait soin khent auzgeredet in an tagung durchgevüart von djornalìst Gabriele Buselli. ’Z håmda genump toal di vortretar von Zimbar Kulturinsititut Lusérn von Haus dar Zimbrischen Bizzekhot Robaan, von Curatorium Cimbricum Veronese un von Zimbar Team “FC Lusern”. Dena saitma gånt z’èzza in vormaz boda soin khent gekhocht zimbresche spetzialitét von Draitza kamöündar un vo Lusérn.
In tages hatta gemacht soin kontzèrt da Zimbar Korale vo Lusérn in di khirch vo San Lorenzo, dena soinda gest spiln vor di khidar un izta khent gezoaget dar film “Velovelodico” von Alessandro Anderloni, boda hatt gebunnt in prais Eusalp un Mets in trianar Film Festival.
Zbisnen in åndarn, in trèff soinda o gest dar pürgermaistar vo Ala Stefano Gatti, di vortretar vodar kamòu Djunta, di pürgermaistarn von lentar nidar nåmp, dar vorsitzar vo Toalkamòu vodar Zimbar Hoachebene Isacco Corradi, dar vorsitzar von provintziàl Rat Claudio Soini, dar provintziàl konsildjìar Walter Kaswalder, un dar redjonàl asesór Luca Guglielmi, di parlamentàren Vanessa Cattoi, di vortretar von dianst vor di zungmindarhaitn un auzante relatziongen vodar autonome Provìntz vo Tria un vortretar von pintarn.
Da dar service video > https://shorturl.at/cLXd4
Übarsetzt von Schaltarle vor di zung von Toalkamou vodar Zimbar Hoachebene
