“Sion chiò – l à dit l president – coi ombolc, coi raprejentanc de la Comunitèdes, coi conseieres provinzièi e coi parlamentères leé a chisc teritories, per despieghèr olache sion rué dal pont de veduda tecnich e dir amò na outa che la prozedura che vegnarà envià via per ruèr a la dezijion da man de l’Aministrazion provinzièla la tolarà ite duc i raprejentanc istituzionèi. Volon ence deschiarir soraldut vèlch aspet de la valutazion, per ejempie l’emportanza del Navip, l Nucleo de valutazion e zertament di investimenc publics che l dèsc ju n parer tecnich giuridich fianzièl dintornvia l projet”. L iter del Navip l é do che l va inant e l parer definitif, l à dit l president, l dovessa ruèr te vèlch setemèna.
L president l à dapò recordà che l finanziament jà stanzià per l ospedèl de Ciavaleis l é amò a la leta e no l mudarà scin a la dezijion finèla.
Col sotrissèr amò apede che chela de anché l é demò la pruma de na lingia de scontrèdes coi aministradores locai sul projet, e che vegnarà tout ite duc i protagonisć istituzionèi sul teritorie, Fugatti l à recordà l valor de la prejenza de la Provinzia, ence co la più auta cariches de sorastanza de l’autonomia trentina. “Per confermèr – l à dit amò – che a chest argoment ge vegn dat na gran atenzion”.
L deschiariment tecnich de la prozedura per la valutazion de la proponeta l ge é stat dat su al diretor generèl de la Provinzia Paolo Nicoletti e ai sorastanc Antonio Tita (Agenzia provinzièla apalc e contrac), Roberto Andreatta (Partiment teritorie e trasporc, ambient, energia e cooperazion) e Stefano de Vigili (Umst gestions patrimonièles e motorisazion zivila). Se à rejonà en cont del encadrament teritorièl (la ipotesa l é chela de l fèr su a Masi), de la strèdes, del prozes de pianificazion, ence coi termins per portèr dant osservazions da pèrt de Comunità e Comuns, de la costions urbanistiches.
L confront anter la soluzions dal pont de veduda organisatif, chela de bater ju e fèr su da nef mingol a la outa l ospedèl de Ciavaleis de ades e chela de fèr su l nef fabricat argoment del PPP, l é stat fat dai tecnics de la Provinzia dessema con chi de la Apss.
L ospedèl che vegnarà troà fora per Fiem, Fascia e Cembra, l à sotrissà Antonio Ferro, diretor generèl f.f. de Apss, “l arà na emportanza fondamentèla tel ambit del ospedèl polizentrich troà fora dal nef endrez di servijes sanitères tel Trentin e l sarà pèrt en dut e per dut del projet de la Università de medejina”.
Per l diretor del Servije de ospedèl provinzièl de Apss Pier Paolo Benetollo, “n ospedèl modern l cogn esser bon de se adatèr dal pont de veduda struturèl e impiantistich a na vida da ge fèr front a ogne besegn o situazion che podessa entravegnir tel davegnir: l Covid ensegna”.
A la scontrèda à tout pèrt estra che i ombolc e i aministradores locai de Fiem, Fascia e Cembra, i raprejentanc de la Comunitèdes de Fiem e Cembra e del Comun general de Fascia. L era ence l sorastant provinzièl Giancarlo Ruscitti (Partiment sanità e politiches sozièles).
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
