La delibera aproèda la met en doura l articol 61-bis de la lege provinzièla 21/1992 (Disciplina degli interventi provinciali in materia di edilizia abitativa), metù a jir da la lege de stabilità provinzièla 2026: chest articol l porta dant na mesura inovativa che la sporc l finanziament de intervenc per l ressanament de frabricac per fitèr da man de persones fisiches. Chest vel dir che l é pervedù la conzescion de n contribut en cont capital ence a sentadins privac che à chela de recuperèr sie frabricac e i dèr a fit a sogec con besegnes abitatives.
Col provediment vegn stabilì i criteries, i requisic e la modalitèdes per l’azess al contribut.
Chi che pel portèr dant la domana
Chi che vel portèr dant la domana cogn aer l titol de proprietà, ence per quotes, de la unitèdes de frabrica loghèdes sul tegnir de la provinzia de Trent.
Intervenc ametui a contribut
I intervenc de ressanament i cogn perveder na speisa de amancol 15.000 euro e na speisa massimala ametuda de 50.000 euro per vigni unità. Canche sarà fenì i lurieres, i cartieres i cognarà esser scric ite te una de la categories del cataster anter A/2 e A/7.
Valor del contribut e de la sovenzions de enjonta
L contribut l vegn conzedù en cont capital e l é l 50% de la speisa massimala ametuda. L pel esser smaorà de 5.000 euro per ogne cartier te chisc caji:
- Se l domandant l se emprevèl di servijes de mediazion di enc zenza fin de vadagn che i laora per ge jir encontra ai besegnes abitatives de la popolazion te condizions de besegn o de desvantaje, o che met a la leta l cartier;
- Se l cartier ressanà no l vegn più dat a fit per n temp curt.
Modalità per troèr fora i fitadins
Per troèr fora i sogec con besegnes abitatives a chi che ge vegnarà fità i cartieres, i benefiziaries del contribut i pel se emprevaler de doi modalitèdes:
- Prozedura direta: i benefizières pel cerner diretamenter i condutores, chisc no pel aer la proprietà esclusiva de n auter cartier se più che l no sie a più che 40 chilometres da chel argoment de fit;
- Prozedura tras i enc zenza fin de vadagn; opuramenter i benefizières pel se emprevaler di servijes de mediazion che vegn sport da enc zenza fin de vadagn che laora per didèr la jent te condizions de besegn o de desvantaje, ence metan a la leta i cartieres ressané.
Per chel che vèrda l paament del fit, sui contrac ge vegnarà metù su n fit slejirì del 15% respet al priesc de marcià descheche l é stat stabilì da la delibera de la Jonta Provinzièla nr. 1060 dai 10 de messèl del 2026.
Termins per manèr ite la domana
Se podarà manèr ite la domanes anter i 24 de aost del 2026 e i 12 de otober del 2026.
L contribut l vegnarà dat fora aldò del orden cronologich de prejentazion de la domandes, fin canche no sarà più ressorses a la leta.
Per finanzièr la domanes de contribut, la Provinzia di Trent l à metù a la leta per l an 2026 na suma en dut de 5 milions de euro.
Sun chesta piata l contribut: https://www.provincia.tn.it/Servizi/Contributo-risanamento-a-fini-locativi-di-immobili-di-persone-fisiche
Traduzion di Servijes Linguistics e Culturèi del Comun general de Fascia
