A la firmes Leitner, Misconel, Impianc Lujia, Forenadoa Moena la conzescion per la projetazion, la frabica e la gestion del coleament
Forenadoa Moena–Valbona, pea via l iter per la realisazion
Traduzione in ladino
[Ladino] Sarà l grop de firmes a temp metù adum da da Leitner Spa, Misconel srl, S.i.f. Impianc portamont - Lujia Spa e Forenadoa Moena Spa a meter en esser e gestir l impiant de la forenadoa che la fajarà da coleament anter l paisc de Moena e l raion da schi Lujia-Belamont. En vender ai 30 de jené aló da la senta de l’Agenzia provinzièla per i apalc e i contrac - Apac, l é stat sotscrit l contrat de conzescion per projetèr, meter en esser, frabichèr e gestir la infrastrutura, passaje fondamental per la realisazion de n lurier strategich per la mobilità e l svilup turistich de duta Fascia.
L assessor provinzièl al turism l à palesà sia sodisfazion per la sotscrizion del contrat, metan al luster coche l passaje de anché l raprejentee n moment fondamental per portèr zeche de contrat a n coleament spetà da temp, e che l pel didèr l’intermodalità e na mobilità auternativa al auto. Per l assessor, chest lurier l veg a aer ence na pèrt emportanta per chel che vèrda la sostenibilità, la calità de la vita e la competitività de la destinazion turistica, con ejic positives per residenc, lurieranc e visitatores.
L projet l perveit de fèr su na telecabina moderna con cabines da diesc posć, che la pontarà via dal
Piazal de Navalge, tel paisc de Moena, e la ruarà sun Valbona, apede la stazion atuèla intermedia de la cabinovia Ronc–Valbona–Le Cune, col garantir coscita n coleament dret e funzional col raion da schi del Lujia.
L investiment total per meter en esser chest lurier l rua a na suma en dut de15,7 milions di euro (zenza IVA), e enveze l valor stimà de la conzescion, per la regnèda de 25 anni, l é de zirca 42,8 milions de euro,
che i corespon al total del faturat che se speta tel temp de la gestion.
Traduzion di Servijes Linguistics e Culturèi del Comun general de Fascia
(cdt)
Immagini
