A Zerimònie, da sèll bodase iz gehaltet an sunta, starch gehöart vo alln un in viln defatte håmda genump toal nèt lai di laüt von lånt ma vo auz o. Disa iz an arbat boda iz khent gepitet vor långa zait; a “huamat” azpeda iz khent khött vo mearare, boda est, dòpo sovl problème, gemocht zbisnen in åndarn vodar pandemì von Covid-19 o, iz gemacht verte. Vor daz sèll o soinda gest sovl laüt zo vaira a modèrnega struktùr augemacht nå kritèrie guat zo macha sparn enrdjì o.
A “huam” boda bart innemmen in an uantzegez haus Pompìarn un Pèrkrettungsdianst, pitt vil platz zo arbata pittnåndar azpez sa vürkhint est, asó azpe da hatt gedenkht dar vorsitzar vodar Federatziong von Fraiböllege Pompìarn Luigi Maturi un von Pèrkrettungsdianst Walter Cainelli, boda håm geredet ummadar nåmp in åndar.
Nèt lai “huam”, ma “hoachmut”, “mittarbat” un “dånkhhait” dise soinz di börtar boda in vil håm khött redante an sunta atz Folgrait, asó azpe in di rede von kapostatziong von Pèrkrettungsdianst Matteo Cuel un in di börtar bodase soin insinamai untarprocht von komandånt von Pompìarn Andrea Ciech. Mearare håm khött vorgèllzgott alln in sèlnl boda håm gearbatet un boda håm augehaltet disan bichtegen prodjèkt un natürlich vorgèllgott izta khent khött in Pompìarn un in Pèrkrettungsdianst o.
“Seng inntretn in disa naüge struktùr – hatta khött dar pürgermaistar vo Folgrait Michael Rech – iz azpe balda khint dar långez. Un ditza – hattar no khött darzuar dar pürgermaistar – iz daz earst gehaüs boda drau bart håm di fåne von Euregio ditza machtaz stoltz zo gehöara alle disarn earde un disan prodjèkt”.
Auzomacha da naüge Kasèrma von Pompìarn un statziong von Pèrkrettungsdianst hattz gekhostet schiar 1.679.000 euro, vo disan mindar baz 990.000 soin khent untargelekk von Kamòu vo Folgrait 329.000 von GSE, 255.000 vodar provintziàl kasse kontra in vaür un schiar 105.000 von BIM Adige. An sunta atz Folgrait soinda gest dar distrikt ispetór Alessandro Adami dar vorsitzar von Toalkamòu vodar Zimbar Hoachebene Isacco Corradi, dar Vorsitzar von provintziàl Rat Claudio Soini di konsildjìaren Francesca Parolari, dar konsildjìar Walter Kaswalder, dar djeneràl dirèktor vo APSS Antonio Ferro, vortretar von Roat Kraütz, von forestél, von Karabiniarn, vodar Zivìl Schützung, feroine, fraiböllege un vil pompìarn von kamöündar nidar nåmp, darzuar pitt ettlane laüt.
Pildar un service von Press Åm
Vorsitzar Maurizio Fugatti
Pürgermaistar Michael Rech
Komandånt Andrea Ciech
Kapostatziong Matteo Cuel
Nimm abe service un video vo disan link
Übarsetzt von Schaltarle vor di zung von Toalkamou vodar Zimbar Hoachebene
