Der president va de autonome Provinz va Poazn ont provinzal asesor ver de Suach ont naiekaitn, der Arno Kompatscher, ist vroa van tema tscherlt: “de energi ist an zentral tema va haitzegento, van sporn va de kròft en sicherkait za hom sn òlbe ganua finz en naia virm ver za mòchen energi. Ver za meing suachen de virm ver za pesser òrbetn, de Suach ist a ding as mu nèt valn.
Pet en doi prais ber belln unterstizn ont mòchen kemmen de boia za leing se zòmm ver de jungen suacher as òrbetn en doi tema”. Der doi nai projekt bill nèt lai pakimmern se van jungen suacher ober ver de gònze gamoa’schòft ver de birtschòft van gònze Euregio.
"S sicherkait za hom òlbe ganua energi pahòltlechkait ist oa’n van bichtestn ziln ver de zukunft van gònze Euregio. Ver dòs bòrt e de naia tschbinnen van bisschòft jungen van Tirol, van Südtirol ont Trentin iber en tema va de energi”,
unterstraicht der kapitan van Tirol, der Anton Mattle. Zòmm pet de tiroler asesoren en bisschòft de Cornelia Hangele, der Mattle tuat innlònen de jungen za toalnemmen en aumòchen an Euregio. “Der Euregio Jungasuacherprais tuat nèt lai enviretrong de zòmmnètz zbischn de drai toalnemmer van Euregio en de bisschòft, ober s gip aa a hilf en techniker vernaiern van ingern lander”, asou hòt de provinzal asesoren Hagele kein.
Der peste projekt bart kriang an prais va 5.000 euro. Der zboate prais bart sai’ va 2.500 euro ont der dritte va 1.000 euro. De projektn barn kemmen austschauk van a kommission vourpfiart va de Ulrike Tappeiner, President va de Vrai Universitat va Poazn. Der praistrèff bart sai’ bail en To van Tirol van europeische Forum va Alpbach, as de 20 van agest 2023. De pestn gabinger barn kemmen inngalònt ka Alpbach ver za vourtrong de sèlbern òrbetn ont austoaln se de ideen pet òndra bisschòftn auskenneta mentschn ont politiker leader.
De vrong asn Euregio Jungasuacherprais konnt men sa vinnen as de sait web van Euregio en adress www.euregio.info/youngresearcher
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
