Traduzione in mòcheno
En Meeting ka Rimini “De kultural pahalter ont s bider augea’ van derver”, s paispil van Trentin
S hòt toalganommen der assessor Marchiori ont der hòt vourstellt an ettlena guata praich za tea’ as de inser lòntschòft
[Mòcheno] En Meeting ka Rimini hòt men klòfft va sozial, va kultur ont va politik durch ausstelln, zòmmtrèffn, vourstelln ont trèffn. En leiste to hòt s toalganommen der provinzalassessor en de politik van haus, en pahalter, en de òllgamoa’pahalter ont en kennen de Autonomi Simone Marchiori aa, as hòt klòfft iber en tema “De Kultural pahalter ont s bider augea’ van derver”, an verglaich iber en de gschicht van an ausstell van Meeting, iber en de zeichen vòlln, an iatn pet sai’na ausònderkaitn, u’gahenk en Pnrr ver za mòchen bideraugea’ de kloa’n derver. De derver en vil saitn va Balschlònt, lem de pfèrlechkait za hom òlbe minder lait, ont dòs trok sa za sai’ òlbe minder pakònnt ont men miast schaung za hòlten au der doi problem. En trèff, moderiart va Giuseppe Frangi, zaitungmònn va Vita, sai’ gaben Francesco Acquaroli, president va de Region Marche; Paolo Baldi, pirgermoaster va Calascio (AQ); Guido Castelli, ausònderkommissar van Stòttregiar ver en richtn ont ausrichtn eartriarnse 2016; Cosimo Latronico, asesor en de tsunthait, en de politik ver en mentsch ont PNRR va de Region Basilicata; Alessandro Piana, omtpresident va de Region Liguria; Donatella Tesei, president va de Region Umbria.
Marchiori hòt klòfft van an studium van 2016, schoa’ vourtschlong en Deputatnzimmer, en beil as unterstrichen kemmen ist as men en de Provinz va Trea’t ont en de telder nèt sicht as òlbe minder lait gip, ober der problem sicht men en de Gamoa’n as vèrrer sai’ van groasn zentrum oder van enteressplatz, ver en turismus aa.
“Der tema ist plaim mòchen de lait en de vèrrer derver. An innbendegen plòtz oder an galeptn pèrg hòt minder problemen ont pahòltet der tolgrunt ont s peinelònt aa. En trentiner model de òcht va de lontschòft ist sait òlbe eppes va òlla. En de vergòngene zait òlla hòt nutzn gahòp va de doi òcht ont zaglaich s vourstea’ za pahòltn s lònt. Ont de doi ist a pahalter as men ausrichtn miast pet en zòmmòrbetgaist as toalmòcht va de inser tròcht”, hòt tsòk Marchiori bail en sai’ paitrog. “Hait hòt s ober turistesn platz bou as de jungen ont de òrbeter vortgea’ avai de haiser kostn za vil. Dinstn abia s sèll va de tsunthait, van kindergortn ont van verkear, sai’ runt bait en inser lònt, ober ber hom gadenkt as noat ist gem paitroger en de infrastrukturn van strosn, ver za versichern de netzn pet de haupstòtt, ber hom gaòrbetet ver de technologesn infrastrukturnnetzn ver za verlaichtern der smart working, ober nou mear - a naikait va de doi legislatur - ber hom anaupaut an nain asesorat ver de hauspolitik ver za òrbetn pesser um en de bichtestn temen van problem van minder lait”, hòt tsòk Marchiori no en de sperimentazion van bandi Coliving envirtrok ka Canal San Bovo ont Lusern pet de projektn va de Fondazione Demarchi.
“De rivenzeiln barn kemmen vourstellt en herbest - hòt vourklòfft der assessor - ober ber hom schoa’ tsechen as gabèkslt ist ont de zboa gamoa’schòftn sai raich kemmen as en social vurm gèltsgott en naia sinergi. S ist ganua song as ka Canal San Bovo hait naia familie toalnemmen en lem va de gamoa’schòft ont de hom aupaut an guatn effect, derbail ka Lusern der kindergortn as hatt gamiast sperrn bavai s hòt lai a kinn gòp, hait hòt 13 kinder, a bècksl as bichte ist ver a gamoa’schòft as bea’ne innvoner hòt”.
Der Marchiori hòt aa vourstellt de vourprojektn sperimental u’ganommen pet en leiste bilanzu’richtn ver za nidern der unterschitt zbischn s lem en pèrg ont s lem en de stòtt, hèlven de jungen spusn ont de groasn familie, ont en de glaiche zait vernaiern de pahalter van haiser as sai’ ver za gem de moglechkait za stea’. “De derver bòcksn no en zentrum as ist ont ver dòs ist bichte gem bèrt en de kloa’n gamoa’schòftn” hòt garift za song der Marchiori.
Der assessor hòt gamecht aa schaung der stand van Trentin augarichtn en Meeting as hòt gahòp aa der simulator ver en sci ont de ausstellung gamòcht as en Alcide De Gasperi as hoast se “Servus inutilis”. Inngabichen en Meeting va Rimini, de ausstellung hòt augatu’ de vaiern van 70° jorzait van gadenk van trentiner De Gasperi. De ausstell hòt gamòcht tschbinnen va òlls sèll as der gatu’ hòt ont va de sai’ òrbet.
Do s gònze trèffvideo van tisch gamòcht ka Rimini:
https://www.youtube.com/live/er5zqLgCPi4
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
