Dì Internazionèla del Lengaz Mère, l lengaz desche cura
Mercoledì, 21 Febbraio 2024 - 12:00 Comunicato
345
Dì Internazionèla del Lengaz Mère, l lengaz desche cura
[Ladino] Te la Dì Internazionèla del Lengaz Mère, che dal 2000 la vegn zelebrèda ai 21 de firé per voler del Unesco con chela de ge dèr valor a la desvalivanza linguistica e culturèla e al poliglotism, l Istitut Cultural Ladin “majon di fascegn”, dessema co la raprejentanzes de sacotenc lengac de l’Europa membres del la NPLD-Network to Promote Linguistic Diversity, l à tout pèrt al endrez de n video, en colaborazion co la Cèsa de Paussa de Fascia, olache dotrei operatores del setor sozio-assistenzièl fèsc sia testimonianza su la doura del lengaz dal post per didèr la comunicazion coi ghesć.
Furlan, catalan, valecian, basch, ladin, frijon, galeis, ma ence svedeis te la Finlandia e unghereis te la Romania, l é dotrei ejempies de lengac che vegn durà duc i dis te situazions te cheles che l lengaz, chel de la mère, l sciauda ite i cheres e l fèsc sentir a cèsa ti moments senestres.
L video, defat, l é stat pissà no demò per valorisèr i lengac de mendranza, ma soraldut per rengrazièr duc i operatores sozio-assistenzièi che doura e à emparà l lengaz dal post per secodir i pazienc.
La NPLD-Network to Promote Linguistic Diversity – l é na rei paneuropeèna con senta a Bruxelles che la laora tel ciamp de la politica e de la pianificazion linguistica te l’Europa. La tol ite goergn nazionèi e regionèi, universitèdes e sociazions. La Provinzia autonoma de Trent, che la raprejentea la comunanzes cimbra, mòchena e ladina, la é member de pien derit.
