No 14 jarder van earste switch off – s jor 2009 ist gaben s leiste jor va de analogesche television ont s hòt de digital u’pfònk -, de digitaltelevision en 2022 bèckslt bider, s geat au definitv de hoa definizion.
Der Minister van Birtschòftverpesser hòt u’ganommen as en Trentin barn de frequenzen van televisionsendern va de 15 finz af de 23 van hourneng bideraustoalt kemmen. Ver za mòchen pasn de òrbet pet de Regionen ont de Provinzn as af de grenz sai’, de zaitn barn pahenner sai’ ver a toal platz: af de 4 van hourneng en de Gamoa’ va Bondone, en Valle del Chiese af de grenz pet de Lombardia; af de 8 van hourneng en de Gamoa’ va Vermiglio (hoa Val di Sole òlbe af de grenz pet de Lombardia) ont af de 14 van hourneng en hoa Val di Non ont a stuck va de Val di Sole, zòmm pet a toal eirter van Sudtirol.
De nai sait ver de trentiner
En Trentin, de sait bou za druckn ist www.trentinoinrete.it/Tvdigitale, gamòcht van sistembèrk Trentino Digitale. En de sait as keart en de digitaltelevision van Trentin en nètz, kònn men vinnen zeitler van zeichen ta bou as barn kemmen gem de frequenzen. Òll zeitl hòt drau de Gamoa’n enteressiart, de lòntkòrt bou as de television derbischt, de haupnochrichtn ont a toal rotn as meing hèlven. En u’vong, de sait stellt vour biavle as sai’ de Gamoa’n as en hourneng barn sai’ enteressiart van refarming van frequenzn.
As de garèchte sait va de digitaltelevision, de lait barn meing sèchen de tutorial video ont vinnen de numere za riaven u’ ver za mòchen se hèlven.
De sendern barn se toaln de frequenzen ont asou de trentiner barn bider miasn suachen de programm, as bècksln ourt ver ourt ont ver Gamoa’n enteressiart; s doi bart miasn kemmen gatu’ der sèll to en beil as kimmp gatu’ de òrbetn (spat nomitto oder zobenz).
Laischiar en òlla de televisionen de suach kimmp sèlber gamòcht. Benns de television hòt nèt de doi moglechkait, bart men miasn sèlber de suach mòchen.
Ver de stòttregln, de sait za schaung ist de sèll van minister van Birtschòftverpesser (Mise): https://nuovatvdigitale.mise.gov.it.
De òndern ta va de digitaltelevision
As de òchta van merz 2022 en gònze Balschlònt bartn kemmen u’ganommen de nain regln ver za lòng sèchen MPEG-4, as s ist de hoa definizion, ober s kimmp gahòltn der standard DVB-T.
En doi vòll aa ist pesser za mòchen bider de suach van programm.
Van earste to van genner 2023, de balsch television bart definitif u’nemmen der standard DVB-T2. Òlla de stòttsender as kemmen schaung galòk pet codec video Mpeg-2 barn kemmen ogalescht vour as aus ist der 2022, ont ber as nèt hòt a television oder an decoder as rècht ist, bart sa nea’mer kennen sechen.
Ver za hèlven za kaven de nain televisionen ont ver za leing zan plòtz de òltn, der Mise hòt vour zboa stòtthilf: der Bonus television – Decoder ont der Bonus Bècksl television.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
