Per l 2025 l é pervedù doi trac de temp per poder portèr dant la domanes: dai 19 de mé ai 30 de jugn e dai 8 de setember ai 23 de otober.
Se pel portèr dant la domanes demò online tras la “Stanza del Cittadino”, a la leta - ensema con la documentazion de la scomenzadiva - a la direzion https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono.
La scomenzadiva la perveit n stanziament de 10 milions de euro en dut (5 milions per l 2025 e 5 milions per l 2026).
Acioche i sentadins posse scriver ite ite la domana e ge vegne dat duta la informazions che serf per tor pèrt al avis, l é stat metù a jir n portel informatif tras telefon gestì dal Ofize politiches de didament e azions de semplificazion urbanistica, con senta te str. Malta 67 a Trent. L servije l é a la leta dal lunesc al vender da les 9:00 a les 12:00 al n. de telefon 0462 492712.
Estra apede se pel ence manèr na mail a la direzion recuperocentristorici@provincia.tn.it.
Chi che pel portèr dant la domana
Pel portèr dant la domana demò persones fisiches (no firmes) che l é, o che doventarà dant da sie meisc, patrones o titolères de n derit reèl sun frabicac en esser ti comuns enteressé. Duc chi che domana pel ciapèr contribuc per no più che trei unitèdes abitatives. L é de obligh meter a jir amancol un intervent de recuperament sul cartier da durèr desche pruma cèsa, olache l patron l jirà a stèr o che l fitarà con n fit slejierì.
Per amancol 10 egn l patron l cognarà jir a stèr tel cartier o l cognarà l fitèr.
L contribut l pel tor ite ence na quota per comprèr l cartier, purché no se ge l compre ju a n parent o a n parent no diret de prum degré, ma no se pel conzeder n contribut demò per comprèr. Chi che à più che 45 egn e vel durèr l cartier desche pruma cèsa no pel esser n sentadin, ai 6 de aost del 2024, del comun olache l é l cartier.
Contribuc pervedui
- Per fèr fora: fin al 40% de la speisa ti zentres storics e al 35% te l’autra arees, con na suma massimala de 80.000 euro (sun na speisa ametuda de 200.000 euro, speisa minimala 10.000 euro).
- Comprèr: 20% del valor del frabicat sotmetù a calificazion neva, scin a na suma massimala de 100.000 euro de speisa ametuda.
Speises da poder ameter
- Daite (max 125.000 euro): soletes, ujes, impianc idraulics, termics (fora che i tulins fotovoltaics), eletrich, scèles daite no en comun.
- Defora (intervent sun dut l frabicat o su la facèdes): cuert, mures, elemenc de prijie, scèles, barcons, fons, sieves.
- Speises tecniches: ametudes scin al 10 % de la speisa per vigni categoria (daite/defora).
Vincoi
L domandant cognarà esser l patron o l titolèr de derit reèl canche vegn portà dant la domana o dant da sie meisc. L frabicat no l pel fèr pèrt de la categories de cataster A1, A8 o A9, no l cogn aer ite più che ot cartieres e nience esser te n condominie.
Ogne contribut l vegnarà coleà a n codesc CUP, da meter sun duta la fatures che revèrda la speises rendicontèdes. Ge vel portèr dant la rendicontazion dant da 24 meisc da la conzescion del contribut.
L é descomanà meter adum l contribut e etres finaziamenc publics, tout ite la detrazions fiscales, con referiment al medemo intervent ti ultimes 10 egn.
Modalitèdes per portèr dant la domana
Se pel portèr dant la domana da en lunesc ai 19 de mé su la piataforma online a la leta a la direzion https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono olache se pel veder ence i detaes del provediment.
Cò, per l medemo frabicat o unità, più che un domandant aessa da portèr dant domana, demò un (con SPID o CIE) portarà dant la domana ence per i etres.
Documentazion che serf
L domandant canche l porta dant la domana l cognarà enjontèr:
- relazion tecnica sotscrita da n profescionist abilità, con descrizion di intervenc e coerenza coi criteries del contribut;
- preventives e/o calcol di cosć;
- se l é più che un domandant: delega e declarazion de duc;
- declarazion de consens a fèr i lurieres sotscrita dai etres patrons o da chi che à derit.
Graduatoria
La domanes les vegnarà valutèdes aldò di criteries spezifiché te la delibera, che se pel vardèr fora anter i documenc a la leta junsom a la piata a la direzion https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono.
I comuns enteressé
L provediment l revèrda i comuns de: Altavalle, Bleggio Superiore, Bondone, Borgo Chiese, Bresimo, Canal San Bovo, Castel Condino, Castello Tesino, Cis, Cinte Tesino, Dambel, Frassilongo, Grigno, Livo, Luserna, Mezzano, Novella, Ospedaletto, Peio, Pieve di Bono-Prezzo, Pieve Tesino, Rabbi, Rumo, Sagron Mis, Segonzano, Sover, Terragnolo, Tre Ville (fora che Palù di Madonna di Campiglio, Comun Catastal “Ragoli II”), Valdaone, Valfloriana, Vallarsa, Vermiglio .
Drucan chest link se pel desćiarièr imagimes e intervista
L’intervista al president Maurizio Fugatti
La imagines
Traduzion di Servijes Linguistics e Culturèi del Comun general de Fascia
