Disa naüge arbat geat vür pinn sèlln arbatn boda sa soin khent gemacht sin haüt un ågeheft no in di djar ’90 zo richta in provintziàl bege 133. Di lestn arbatn soinse gemacht verte ’z djar 2023 pitt disan hattma geredegart un gebetart in tòkko zbisnenen in km 6,6 un in km 6,8 (arbat S-891). Dena soinse gevuntet dar vorsitzar vodar Provìntz un di pürgermaistarn vo Folgrait, Lavròu, Lusérn, Kalnètsch, Leve un Plaif pittnåndar pinn provintziàln tèknege, un izta auzkhent zo pezzra in bege haltante di stöll bodada soin un zo nützase lai in gianan aubart, machante, anvétze an tunnel zo giana in nidar.
Di arbat gelekk in apalto vor in earst toal lekk vür herzorichta khlummane tökkla boda soin drå nidarzorütscha un zo betra drai khearn perikolosat. Dar bichtegarste toal von prodjèkt iz khött “Intervento C”, un iz betarn aftz obar abenemmante in kròtz un atz åndre saitn betrante untar machante au a maur postart aftz mikro saüln. Pinn zil zo halta daz mearste boma mage in stòrege tòkko, zbisnen in zboa stöll bodada soin est, barta nicht khemmen getånt vo groazez un barta soin an uantzega korsia lai in aubart bait 2,5 mètre un an rånt auzzalt vo 1,15 mètre, obar zuar in pèrge barta o soin a rånt betar odar engar boda geat auz nå in krotz. An lestn izta di arbat gehoazt "Intervento G", boda vürlekk zo macha an naturàl tunnel pittnar uantzegen korsia lai in nidarbart lång 255 mètre. Drinn barta soin a korsia bait mearar baz drai mètre un zboa rent auz nå. In emerdjéntz bartz soin asó möglich azta mang pasàrn zboa meze saiz in nidar saiz in au.
Dar prodjèkt iz khent gemacht von inzenìar Paolo Nicolussi Paolaz, von Dianst vor di beng un aisanpån vodar Provìntz, dar vorbörtlich vodar arbat, anvétze, iz dar inzenìar Carlo Benigni. In gåntzan di arbat bart khemmen zo khosta vor in toal 1, 8.583.500 euro, vo disan 235.500 euro vor di siacharhait. ’Z gèlt hintargehaltet vodar vüarom azta berat eppaz boda nèt geat un vor åndarst iz 3.226.100 euro. Di zait vürgelekk zo macha verte di arbatn iz vo 560 tang.
’Z Åmt Apac hatt auzgètt in telematesche auzschraibung pinn kriterio berda inngitt daz bölvraste afte plattform Contracta atz 30 von prachant 2025. Dar lest tage innzogeba di opfarn iz gevestet vor di 12:00 von 2 von herbestmånat 2025. Dar earst setz gara bartze haltn atz 3 von hebestmånat 2025.
Übarsetzt von Schaltarle vor di zung von Toalkamou vodar Zimbar Hoachebene
