Bichte, vor disa initziatìf izta dar finantzièll schütz vodar autonome Provìntz vo Tria o, boda vorz djar 2027 bart khemmen gekreschart von 94.623,04 euro zuargètt vorz djar 2026 afte 105.000 euro zuargètt vorz djar boda khint.
Studjàrn, arbatn, pratikantàt, zivil dianst, ma o frai zait un esperientzan in auzlånt: 'z Schaltarle gitt informatziongen übar alle di sachandarn boda ågian in djungen. Berda zuargeat vinnt arbatar boroatet boden mage khemmen gevorst a hilfe zo vorstiana bo åzoheva. Nèt lai, G+ iz punkt Eurodesk o, da européan nètz boda gitt informatziongen in djungen übar di oportunitét vo studjo, arbat un machan fraiböllege arbatn auz von Beleschlånt.
Dar haup setz iz in Bege Belenzani 13 un iz offe von menta aftn vraita. Ma ’z Schaltarle steat nèt gespèrrt inn tortemìtt in maurn vonan åmt. Defatte ma makz vennen in naüge Spazio Giovani Contentissimo boda geat inkontro in djungen in di plètz bosa sa gian un vüarn sèmm o di informatziongen boda servìrn.
Un no, auz pan djar G+ lekk au trèff in di schualn von Trentino un in di sèlln okasiogen, vüart ’z Schaltarle in da gåntz Provìntz, opfrante in dianst in sèlln boda lem in di teldar bait vort vo Tria o.
An lestn, bartnsa soin vil di sachndarn augelekk. Daz earst izzese djüsto gemacht verte: in di tang 22 un 23 von bimmat izta khent hergerichtet kan Contentissimo di fiara vodar internatzionàl mobilitét “Go” boda hatt gesek nemmen toal sèkshundart laüt un famildje. ’Z håmda genump toal dar initziatìf da autonome Provìntz vo Tria, Ad-personam, di Universitét vo tria, Eures, Euregio, Europe Direct Trentino un a zbuantzekh feroine un adjentzìan spetzalizart in internatzionalege auhalt. Darzuar soinse gehaltet ettlane individuèll trèff pinn auzlegar.
Dar trèff boda khint bartze haltn auz pan långez pittar Fiara von Summar Oportunitét.
Mearare informatziongen un bia un baz übar di oportunitét afte websait www.sportellogiovanitrentino.it
Intervista dar asesören Gerosa
Übarsetzt von Schaltarle vor di zung von Toalkamou vodar Zimbar Hoachebene
