L è stat fat la sentèda di Governadores de la Provinzia autonoma de Trent, del Vorarlberg e de la Baviera

Arge Alp, ge dèr n nef sbunf al mond de la Èlpes

[Ladino] I raions da mont, enceben che i fèsc pèrt de Stac desferenc, da spes i se troa tedant da la medema endesfides. Per chesta rejon acà pech temp, en ocajion de la sentèda del "Presidium Arge Alp" – l organ metù sù dai raprejentanc istituzionèi di teritories che atualmenter i à te man la presidenza de la Comunanza de lurier, chi che i è stac a cef l an dant e che i sarà tedant l an che vegn, più avisa Vorarlberg, Trentin e Baviera – i se à confrontà su la mesures e i projec atualmenter en esser.
Desche lech economich e vital, i raions da mont i à da restèr n lech inovatif per la firmes e l turism, e col se tor fora per coche l è fat so raion a duc i livìe, ma i copgn ence vegnir stravardé desche arees de n’auta calità de vita. L raion alpin l arà besegn ence per l davegnir de na strategia de fazion col obietif de ge fèr front miec che l è meso a la endesfides che l à tedant, descheche l à sotrissà l president del Vorarlberg e president atual de Arge Alp Markus Wallner, che l à metù al luster coche nesc teritories i pel se svelupèr amò de più demò se a la generazions jones ge vegn sport n davegnir olache les podarà se dèr ju con bona voa. Soraldut l networking tel setor de l’istruzion e na forta colaborazion te duc i setores de la vita alpina i cognessa portèr la popolazion de la Èlpes a esser più enjignèda per l davegnir. A la sentèda à tout pèrt très coleament l vizepresident de la Provinzia autonoma de Trent Achille Spinelli e, per la Baviera, l minister de Stat Eric Beißwenger.