Dokumentn, letrattn, piacher ober gor film ont audio-aunemmen

An projekt ver de katalogasion va sèll as galòt hòt der Giuseppe Šebesta

[Mòcheno] Der poemesch etnograf Giuseppe Šebesta (1919-2005) hòt s sai’ gònz lem praucht za nemmen au informazionen as en lem ont as de gschicht van gamoaschòft van Alpn, der hòt zuaklaup vil material as ist kemmen praucht ver de konferenzn ont ver de publikasionen ont iberhaup za mòchen kennen de doing gamoa’schòft pet de musealisazion.
De vilsaitiket va bem as hòt s lem gem en Etnografischer museum va S.Michele, vinnt men sa gor en de dokumentasion as, en de leistn jarder van sai’ lem, hòt er arschleng galòt en mearer instituzionen, provinzialeta ont extraprovinzialeta. Zbischn de doing ist gor naturlich der museo ka S.Michele, s Bersntoler Kulturinstitut ont de Fondazion Giovanni Angelini va Belluno.
Pet en zil za mòchen virtualet trèffen s sèll as der Giuseppe Šebesta galòt hòt ont za mòchen en òlla va der sai’ òrbet eppes learnen, de Fondazion Angelini hòt envir tschoum en projekt: “La valle dei mòcheni nell’archivio di Giuseppe Šebesta, patrimonio per le Dolomiti delle giovani generazioni”, ont hòt zua gariaft za tea’ zòmmen òrbetn gor en Mets, en Bersntoler Kulturinstitut, de UMTS Ouberregiar van Kulturpahalter va der Autonom Provinz va Trea’t, der Dipartiment va umanistische Studien ont van Kulturpahalter va der Universitèt va Udine ont der Etnografischer Museum Dolomiti va der Provinz va Belluno.