“Benn as Vaia kemmen ist - hòt der derzua der president va de Provinz tsòk - oa’na van earstn platz as e gòngen pin za pasuachen ist prope de soi gaben ont i denk mer de bichtege òrbet as de vraibellega pompiarn gatu’ hom”.
Der pau, as en plòtz van òlt magazi’ va de kooperativ Sant’Orsola gamòcht kemmen bart, tschbinnt vour 2,9 milionen euro, van beiln as 2,1 milionen ver en nai sitz van vraibellega pompiarn praucht kemmen, zolt va de amministrazion durch en de Prennschutzprovinzalkasse, ont 475 tausnt euro ver en gamoa’magazi’ dernem barn zolt kemmen van Provinzalstrategikgèlt. Der pau ist toalt en drai steck, pet dinstlokaln ont techniklokaln as guat gea’ ver de òrbet va òll to van vraibellega pompiarn, s hòt an garage, an gamoa’magazi’ ont an plòtz vour. Der parkplòtz bart drau avn pau kemmen, ont der bart pet armiartnbeton ont holz paut kemmen.
Ver en pirgermoaster ont president va de Tolgamoa’schòft, Fontanari, “s ist a bichtega òrbet ver de gamoa’schòft, as gip de moglechkait za biderprauchen der grunt avn beil as schoa’ hòt an gamoa’pau as ober nèt rècht statisch ist, ont as en 1981 abia magazi’ ont sitz van an bèrk praucht kemmen ist, an bèrk as nou bichte ist, pet en rif za biderprauchen ont nèt naiprauchen s lònt”. “Ber hom zòmm pfuntn - der hòt derzua tsòk - an rèchtn ont strategik plòtz pfuntn, as de moglechkait gem bart en de insern pompiarn, hèrz as schlock va de inser gamoa’schòft, za òrbetn en an guatn vurm nèt lai ver de inser gamoa’schòft, ober ver en gònze lònt. Drinn en sitz, barn ber denken, pet an kloa’n zoach, s augea’ van bèrk Sant’Orsola ont de gschicht van vourder pau”.
“Der sitz - hòt tsòk zan leistn der inspektor Oberosler - ist der u’vòngpunkt ver de vraibellega pompiarn, an zentrum van beil as de òrbet avn lònt u’vònk. Ver dòs ist s bichte a guata umbèlt, en de beil leing meing òlla de plinder ont dinstn as noat sai’. De pompiarn van Oachpèrg hom noat gahòp van doi nai haus, ober s ist an rif van gònze distrekt”.
De òrbetn sai’ gem kemmen en bèrk Basso. De barn 330 ta tauern.
En doi link vinnt men der service video
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
