«De nòchpern tschefter ont de birtshaiser - hòt er unterstraicht der vicepresident ont assessor en birtschòft va de Autonome Provinz va Trea’t Achille Spinelli, benn as der hòt vourstellt s moss – sai’ nèt lai bichte bavai de verkaven, ober de derstelln bircklega sozial schutzpunktn bichte ver za mòchen nèt vliachen de lait as lem en de doin derver. Pet en doi bando tea ber birckle hèlven de bèrkn ver za lucken de earstn kòstn as men praucht benn as men au tuat, en an ausòndern vurm de jungen ont de baiber as belln selber an òrbet autea’. Ber belln hèlven de bèrkn as autea’ en de lander as reskiarn za kemmen verlòck ont asou gem de moglechkait za sai’ aktraktiv, rècht ont strategisch ver de zukunft van Trentin».
Der bando gip a hilf ver de earste operativunitet, ver en u’vòng van earstn sitzn oder ver de sèlln as bècksln plòtz ver za gea’ en oa’na van doin gamoa’n tscherlt. De gèltunterstitzn barn meing u’gaheift sai’ van earste to van genner 2026 ont de miasn garift sai’ vour de 18 mu’netn va benn as s ist kemmen gem de hilf. Der paitrog mu’ lucken aa s kaven oder s ausrichtn van pahalter ont de òrbetn as men praucht ver za stelln aus der sitz, van maschi’n as de plinder ver de innrichtn. S sai’ gilte aa de kòstn ver de informatik programm, technicke ont specializiarte rotn - de sèlln as men praucht aa ver za vòngen u’ ont ver de projektn ver en marketing ont e-commerce - ont ver de ausònder u’lear.
S moss kònnt sai’ gaheift van 10%: ver de bèrkn bou as paieren baiber sai’ oder junga oder ver de sèlln as u’stelln an òrbeter pet volla zait as miasn u’stelltn plaim ver drai jor. En vòll van a gasèllschòft, ver za kriang mear, der 51% van gasèllschòfter oder van toal miast sai’ van a baib oder van an jungen as hòt nèt mear abia 35 jor, as miasn sai’ de amministratorn. De gamoa’n as toalmòchen, sai’ de sèlln as as de 31 van schantònderer 2025, hom nèt mear abia viar hòndlbèrkn ont/oder birtshaiser offet gahòt hom, no de datn van Hòndlregister. De lista van platz ont de numer ATECO mu men vinnen as bando.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
