«Di geschfèft nåmp in laüt von lentar un di ristorént – hatta gemecht zoagante ’z maz, dar vitzevorsitzar un asesór afte ekonomesche auzvüarom vodar autonome Provìntz vo Tria Achille Spinelli – håm nèt lai an ekonòmeschen vèrt, ma ’z soinz sotziàl un indentitàr schützpünkt gåntz noat zoa azta di laüt nèt gian vort von khlumman lentar. Pitt disan auzschraibung legbar untar a starcha hilfe boda gitt zuar zo halba bazta khint gezert von firmen åzoheva un helft übarhaup in baibar un in djungen un gitt naüga arbat. Bar bölln auleng di konditziongen azta untarnemmen in di lentar boda soin a riskio håndls auzstèrm saibe a guata oportunitét boda mage soin augehaltet un stratègesch vor in gåntz Trentino».
Dar auzschraibung haltet au di öffnung von earst operatif setz, odar vonan naüng setz, odar no zo vüara soin arbat in ummaz von lentar boda soin khent darkhennt. Di arbatn mang åhevan von earst von hoachnach 2026 un mochan khemmen gemacht verte vorda auz soin 18 månat dòpo azta iz khent zuargètt dar schütz. Dar schütz mage dekhan bazta khint gezert zo khoava odar auzzoirichta ’z gehaüs un allz bazta iz mångl innzorichtase in setz, impiånte, makinardje, un möbl. Darzuar makma nützan ’z gèlt vor informatege progrémm, tèknesche un spetzialistege konsulentzan – di sèlln boda soin mångl zo maga åhevan z’arbata o, vor prodjèktatziong, vor marketing un e-commerce – un abezolirna di laüt.
’Z maz lekk vür an 10% vor firmen augelekk vo baibar odar vo djunge un vor di sèlln boda åstèlln a mentsch vor vollzait vor daz mindarste drai djar. Vor bazta ågeat in gesèllschaft, zo haba mearar izta mångl azta daz mindarste dar 51% von toalnemmar soin baibar odar di toaln soin vo baibar odar djunge untar di 35 djar boda mochan soin vüarar o. Di kamöündar darkhennt soinz di sèlln boda atz 31 von kristmånat 2025 håm gehatt daz mearaste viar aktivitét saiz geschèft saiz ristorént nå in sèll boda auzkhint von Register von firmen. Dar roatordnung von lentar un di kòditze ATECO vorgelekk soin drinn in auzschraibung.
Übarsetzt von Schaltarle vor di zung von Toalkamou vodar Zimbar Hoachebene
