L Istitut Cultural Ladin e i joegn de la Sociazion Inout endreza la paladina per portèr te Fascia l Babel Film Festival
"Al dì de doman” na scomenzadiva de film per ladin per averjer i confins
[Ladin ] N projet ambizious per n grop de joegn che con sia braura podarà ruèr a piz. Se trata de endrezèr te Fascia na edizion locala del premie Kentzeboghes (dal sard 'zenza ousc) - scomenzadiva che engaissa la produzion de cortometrajes per lengac de mendranza recognosciui da la Lege 482/99, che la stravèrda la 12 mendranzes storiches sul tegnir de la Tèlia. La scomenzadiva vegn ca da na proponeta de la Majon di Fascegn leèda da na cordanza istituzionèla co la Sociazion Babel de Cagliari, che da 14 egn la endreza l Babel Film Festival, premie inernazionèl de chino per lengaz de mendranza che l à premià sacotenc de regisc' e produtores te dut l mond. Per smaorèr la produzions de chesta sort l é de besegn che les vegne tegnudes su finanziariamenter ence a livel istituzionèl e che vegne sport formazion te na èrt amò pech sparpagnèda fora te la comunitèdes linguistiches. Apontin con chest obietif l é nasciù te la Sardegna l Premie Ketzeboghes portà te Fascia da la Majon di Fascegn e tout su con snait da n grop de joegn anter i 16 e i 20 egn che fèsc referiment a la sociazion culturèla ladina Inout, che la à scomenzà a lurèr sun chesta proponeta ence de gra a n finanziament del Projet joegn La Risola, tel projet Troupes. I dis passé i bec de Inout, compagné da la presidenta del Istitut Ladin Tea Dezulian e da la diretora Sabrina Rasom, i à portà dant tel Teater Adriano de Cagliari n prum curtmetraje resultat del lurier per emparèr a scriver n projet video. L resultat, dal titol 'Al dì de doman', l é statde gra al didament de Tore Cubeddu e Paolo Carboni, promotores del Babel e regisć cognosciui tel mond de la produzions video per lengaz de mendranza. Al event à tout pèrt ence l assessor ladin Luca Guglielmi che estra che esser ladin l à reijes sardes. L assessor à uzà fora l valor de chesta scomenzadiva engaissan i joegn de Inout a jir inant con cheat projet e a sparpagnèr fora sia pascion per sia identità e per sie lengaz mère.
Tel medemo event, che ge é stat dat l titol 'Davegnir impari' (che l vegn fora da la pruma parola per ladin e da la seconda per sard col segnificat de 'ensema') l é stat portà dant ence n curt video inedit del joen fascian Nicoló Dorich 'La gran lavada'. E amò apede l grop de musega fascian Popcorner se à portà dant con cianzons per ladin dessema con n grop de joegn musizisc' sards, viventan amò de più la sera cagliaritèna.
Per valorisèr la oportunità de chest viaje a Cagliari, Istitut Ladin e Sociazion Inout à ence colaborà co la professora de sard de la Università de Cagliari Giulia Murgia e sie students per fèr scontrèr i doi gropes de joegn che, en vender ai 15 dadoman, te la Università sarda, i à portà dant sia storia, sia cultura e sie teritories, e i à descoret fora ensema temes emportanc del esser comunità de mendranza, se baratan idees e reflescions. Amò apede, en sabeda ai 16 dadoman, i joegn ladins à lurà per meter ju n bando per l prum premie Kentzeboghes de Fascia, da dèr fora del 2025 per la produzion de filmac e curtmetrajes per ladin. "N lurier che jirà inant donca, conferman la fiduzia che la Majon di Fascegn à te la neva generazions ladines, stolzes e originèles tel palesèr sie lengaz e sia identità", descheche declarea la diretora Rasom e descheche sotrissea la presidenta Dezulian, recordan la emportanza de vardèr inant per ge arsegurèr n davegnir a l'identità ladina.
I curtmetrajes prejenté a Cagliari sarà porté dant ence te Istitut Ladin a Sèn Jan en domenia ai 24 de november da les 5 domarena, per spartir co la comunanza l empegn di joegn ladins per sie lengaz. "I joegn del projet Troupes lurarà al Avis de concors per la produzion de film per ladin fora per l 2025 ensema al Istitut ladin, jan inant con na colaborazion percacenta che met a la leta di joegn e de duta la comunanza oportunità de crescimonia e de confront", sera su l president de la sociazion Inout, Thomas Zulian.
(S.Ra.)
Immagini
