Traduzione in ladino

Al Meeting de Rimini “Patrimonio culturale e rinascita dei borghi”, l ejempie del Trentin

[Ladino] A la dì che à serà su l Meeting de Rimini, che l à soscedà riflescions tant sozièles, che culturèles e politiches tras mostres, convegnes, spetacoi e scontrèdes, à tout pèrt ence l assessor provinzièl a la politiches per la cèsa, patrimonie, demanie e promozion de la cognoscenza de l’Autonomia Simone Marchiori. El l à portà dant sie intervent en cont del argoment “Il patrimonio culturale e la rinascita dei borghi”, n confront dintornvia na mostra endrezèda apontin tel chèder del Meeting, sun diesc ejempies, vigniun con sia particolaritèdes, leé al investiment del Pnrr per ge dèr neva vita a la picola realtèdes. La viles, de fat, te tropa pèrts de la Tèlia, les é do a vegnir arbandonèdes e donca les pert ence sia atratività. L é debesegn de fèr zeche per fermèr chesta situazion. A la scontrèda, reta da Giuseppe Frangi, giornalist de Vita, à tout pèrt ence Francesco Acquaroli, president de la Region Marche; Paolo Baldi, ombolt de Calassio (AQ); Guido Castelli, comissarie straordenèr del Goern per l comedament e la ricostruzion teremot 2016; Cosimo Latronico, assessor a la sanità, politiches per la persona e PNRR de la Region Basilicata; Alessandro Piana, president sostitut de la Region Liguria; Donatella Tesei, presidenta de la Region Umbria.
Marchiori l à recordà n studie del 2016, jà portà dant a la Cambra di Deputac, olache vegn sotrissà che, conscidran i numeres, no se pel rejonèr de smendrament de la popolazion te la Provinzia de Trent o te la valèdes, ma piutost la tendenza de nosc raion la enteressea soraldut i Comuns più dalonc dai gregn zentres o dai lesc de enteres, ence turistics.
“La costion l é fèr restèr la jent ti zentres più dalonc. N raion intern o da mont olache stèsc jent l é n lech con manco problemes e l deida a stravardèr ence la valèdes più basses e la pianura. Tel model trentin rencurèr l teritorie l é da semper vèlch de la comunanza. Zacan duc aea na picola pèrt del benesser che vegnia ca dal rencurèr e donca ence la responsabilità de mantegnir l teritorie. Chest l é n patrimonie che l é benfat recuperèr ence tel sentiment de colaborazion che fèsc pèrt de noscia tradizion”, à dit Marchiori te sie intervent. “Anché aboncont l é teritories turistics che i é do a vegnir arbandoné dai joegn e dai lurieranc a cajon del priesc massa aut de la cèses. Servijes desche sanità, scolines e trasporc i é dassen sparpagné te noscia realtà, ma aon conscidrà debesegn investir ence te la strèdes, per arsegurèr i coleamenc con Trent, aon ence investì sun coleamenc infrastruturèi tecnologics per dèr l met de se emprevaler del smart working, ma soraldut – neva de chesta legislatura – aon metù en esser n assessorat per la politiches per la cèsa per ge fèr front ai problemes più grieves che vèrda l risech de smendrament de popolazion”, l à despiegà Marchiori recordan la sperimentazion di programes de Coliving portèda dant a Canal San Bovo e a Luserna con projec de la Fondazion Demarchi.