“Sechen der Euregio pet ausòndra ang”
“De Akademi van Euregio gip en de jungen van Euregio Tirol-Südtirol-Trentin de moglechkait za gea’ drinn en Euregio, za kennen en va glaim, za pasuachen en avn plòtz, ont, nou mear, za lem en turch mearer trèffen”. Derno za hom toalganommen, de jungen barn sechen der Euregio pet òndra ang. I lon inn òlla de lait as enteressiart sai’ za schraim se inn en de doi learmoglechkait”, unterstraicht der kapitan van Tirol Anton Mattle.
Va Toblach ka Arco turch Alpbach
Ver za paroatn se en de seminarbochriven, s barn se hòlten zboa webinar pet unterricht ont moglechkait va diskussion. Der earste tritt va de Akademi van Euregio bart se hòlten va de 30 van prochet finz af de 2 van heibeger 2023 kan Kulturalzentrum van Euregio va Toblach, en Sudtirol, ont bart hom abia tema “Kriag ont rua en Europe”. Der zboate bart se hòltenbail en europeische Forum va Alpach va de 17 finz af de 20 van agest 2023 en asou gahoasn tiroler “lònt van denker”. Semm der tema bart sai’ s toalnemmen ont s zòmm-aupaun van Euregio. Va de 17 af de 19 van òlderhaileng, de gruppe bart se zòmmvinnen ka Arco en Trentin, bou as tiavert kemmen barn de gschichtlegen ont jurischen burtzn van Euregio.
Der kost za nemmen toal en òlla de trèffen, za èssn ont schloven ont van verkearmittln, ist va 90 euro. Men miast taitsch ont balsch kennen (tritt B1 oder heacher) ont men miast schraim an kurzn priaf en beil as men sok avai as men toalnemmen billt.
De Akademi van Euregio ist a naikait van GECT Euregio Tirol-Sudtirol-Trentin zòmm pet de “Federazion Alcide De Gasperi” ont der untersuachinstitut “Eurac Research”.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
