Traduzione in cimbro
Aftn Meeting vo Rimini "Dar kulturàl schatz un daz naügebortn von lentar", bazta khint getånt in Trentino
’Z iztada gest dar asesór Marchiori boda hatt geredet übar di guatn sachandarn getånt in ünsarne lentar
[Cimbro] In lest tage von Meeting vo Rimini, boda iz khent übarlekk aftz mearare sotziàl kluturàl un politike argoméntn, durch auzlegom, tagung, schauspiln un trèff, iztada gest dar provintziàl asesór vor di politike vorz haus, schatz, demånio un zo khenna un zo schütza di autonomì Simone Marchiori, boda hatt geredet übar in tèma “Dar kulturàl schatz un daz naügebortn von lentar” dar hatt geredet konfrontarentese pittnar auzlegom boda iz khent hergerichtet drinn in Meeting, übar zen kase, aniagladar vo disan uantze, gepuntet aftz bia zo nütza ’z gèlt von Pnrr zo macha khearn zo leba di khlumman lentar. Di khlumman lentar, defàtte, atz mearare saitn in Beleschlånt soin hèrta mindar gelebet un vor daz sèll o soinsa hèrta mindar aktraktìf un ditza mocht khemmen gebèkslt. In trèff, durchgevüart von djornalìst vo Vita Giuseppe Frangi, håmda genump toal dar Francesco Acquaroli, vorsitzar vodar Rdjong Marche; Paolo Baldi, pürgarmaistar vo Calascio (AQ); Guido Castelli, komisardjo straordinardjo von Governo vor in teremòt von djar 2016; Cosimo Latronico, asesór afte gesunthait, politike vorz mentsch vodar Redjong Basilicata; Alessandro Piana, vorsitzar vodar Redjong Liguria, Donatella Tesei, vorsitzaren vodar Redjong Umbria.
Dar Marchiori hatt geredet vonan studjo von djar 2016, sa draugeredet in belese parlamént o, boda khütt ke azpe nümmar in di Provìntz vo Tria in di teldar soinda nèt groaze problème vo lentar bodase learn, ma disar problèm iz mearar gehöart in Kamöündar vort bait von groazan stattn odar von plètz boda iz turismo.
“Dar problèma iz machan stian di laüt in di lentar vort bait. A lånt vort bait odar a lånt vo pèrge gelebet gitt sichar mindar problème un iz guat zo geba an schütz in teldar un dar ebene o. In Trentino haltn da kunt di earde iz sidar hèrta eppaz boda ågeat alln. Dise djar aniagalz hatt gehatt eppaz zo gebinnada vo disarn kura boda alle håm gehatt vor di earde un vor daz sèll o alle håmda gehaltet azta di earde bosa håm gelebet saibe hèrta da peste boma mage. Un disar iz a schatz boda iz guat azzar khemm gehaltet haüt zo tage o, nå in sèll kooperatìf gaist boda iz toal vodar ünsarn traditziong,” asó hatta khött dar Marchiori in soi rede. “Haüt però soinda lentar boda soin nå zo learase in di teldar sèmm boda iz turismo o, di djungen soinz di earstn zo giana vort ombrómm di haüsar khostn kartza vil. Dianst azpe di sanitét, di khindargart un di traspòrte soin a pizzle bobràll da ka üs, ma allz ummaz habar geböllt untarleng gèlt zo pezzra di beng, zoa zo sichra di pintom zbisnen in lentar vor bait un di haupstatt, ma bar håm gearbatet o zo pinta di lentar pittn naüng teknolodjìan zoa azma mage arbatn vo baitom in smart working, un übarhaup – ditza iz daz naüge vo disarn ledjislatùr – izta khent augelekk an asesoràt vor di politike vorz haus zoa zo maga nåstian pezzar disan tème gepuntet pinn learnse von lentar boda soin auz ar a bege” asó izta gånt vürsnen zo khöda dar Marchiori un hatt geredet von sperimentàln auzschraibung Coliving boda soin khent gemacht atz Canal san Bovo un atz Lusérn pittnåndar pittar Stiftung Demarchi.
Bazta håm getrakk dise prodjèkte bartmaz mang bizzan pezzar auz pan herbest balsa bartn khemmen gezoaget - asó hatta khött dar asesór – ma sichar habar gesek eppaz bèksln un di lentar bosa soin khent vürgetrakk, di kamöüschaft haüt soin sichar eppaz raichar baz vorå. ’Z iz genumma khön ke a Canal San Bovo di naüng famildje soinse drinngemacht un arbatn vor daz guat vodar kamòuschaft, un atz Lusérn hattma gemak offehaltn in khindargart boda berat khent gespèrrt ombrómm ’z izta gest an uantzegez khinn est soinsa in draitzane, eppaz gåntz bichte vor daz gåntz lånt.
Dar Marchiori hatt o geredet von naüng sperimentàln prodjèkte boda soin khent ågenump vodar provintziàl Djunta in lest bilåntz zoa az saibe destrar lem aftn pèrge anvétze baz in tal un zo helva di famildje pitt vil khindar un di naüng zo machanen a haus un in da gelaichege zait auzrichtn di quartìarn bodada sa soin zoa azta di laüt mang lem aftn pèrge auz un auz. “Di periferia iz geroatet nå bia ma sait guat zo pintase pinn zentrum, vor daz sèll haltn azpe zentrum daz khlümmanarste von lentar iz grüntlich”, asó hattar gemacht verte zo reda dar asesór.
Dena dar asesór iz gånt z’sega in stand von Trentino augelekk drinn in Meeting boda hatt an aparatt boda zoaget bia ma geat pinn skin un an auzlegom übar Alcide De Gasperi “Servus inutilis”. Di auzlegom hatt offegetånt ’z gevaira vor di 70ºsidar azta dar trentinar statìst iz gestorbet, übarlegane aftz soi arbat un aftz allz daz sèll bodar hatt getånt.
Da venttma redjistràrt in gåntz tagung vo Rimini:
https://www.youtube.com/live/er5zqLgCPi4
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
