Mercoledì, 29 Gennaio 2025 - 11:54 Comunicato 168

Traduzione in ladino
40eisema Conferenza de la Mendranzes linguistiches, Marchiori: “Argomenc de gran valuta per anchecondì e per l davegnir de noscia comunanzes”

[Ladino] Reta dal assessor provinzièl a la politiches per la cèsa, patrimonie, demanie e promozion de la cognoscenza de l’Autonomia Simone Marchiori, su delega del president de la Provinzia Maurizio Fugatti, ai 28 de jené te Sala Trento, aló dal palaz de Piazza Dante, l é stat la 40eisema Conferenza de la mendranzes linguistiches.
À tout pèrt la sorastanta del Servije mendranzes linguistiches e relazions esternes Elisabetta Sovilla e, a na vida digitèla, l assessor regionèl Luca Guglielmi, estra che sacotenc rapresentanc de la comunitèdes de la mendranzes linguistiches storiches ladina, mochena e zimbra, anter chisc, desferenc raprejentanc del Comun General de Fascia e de l’Union Generèla di Ladins dla Dolomites, sorastanc de scola, membres del Cda di Istituc culturèi e de l’Autorità per la mendranzes linguistiches.
“Chest l é n moment per rejonèr no demò en cont di projec da meter a jir via per chest an, ma ence dintornvia la prospetives che à noscia autonomies e l davegnir de noscia comunanzes, argomenc de gran valuta per tegnir su noscia mendranzes linguistiches”, l à dit Marchiori.
Conferenza Minoranze - Assessore Marchiori [ Veneri - Archivio Ufficio Stampa PAT]

Tel scomenz de la scontrèda, l é stat deschiarì la spartijon del Fon provinzièl per la mendranzes linguistiches e la politiches de intervent per sie stravardament e promozion, mascimamenter tel chèder de l’editoria e de l’informazion tel lengaz de mendranza, con projec che à chela de favorir l sparpagnament di lengac de mendranza de la trei comunitèdes, ence fora da sie teritorie. Finanziamenc che la Provinzia à desponet per 657.121,05 euro per sostegnir l’informazion, per meter a jir projec e scomenzadives de stravardament e promozion de la carateristiches etniches, culturèles e linguistiches de la popolazion ladina, mochena e zimbra e per l finanziament spezifich de atività del Comun General de Fascia, descheche perveit la normativa provinzièla. Sacotantes l é la proponetes per cheles che se dèsc ju la comunitèdes e la istituzions locales ti trei teritories, anter cheles, i prodoc de comunicazion per la stampa e la radiotelevijion, ma ence l sparpagnement di lengac de mendranza anter la generazions più joenes, con ativitèdes spezifiches te la scoles.

Al orden del dì ence la proponeta per meter en doura la Chèrta europeèna di lengac regionèi e de mendranza, che l Consei d’Europa se à metù dant per l stravardament de la mendranzes linguistiches.
“Chel de anché l é n prum vèrech: l’endesfida più grana te chest moment peisse che sie envièr via n debatit e n percors envers n maor stravardament de la comunanzes de mendranza”, l à dit Marchiori, che l à rejonà ence en cont del servije de trasmiscion sui canai austriaches Orf 1 e Orf Sport sul tegnir provinzièl, che pearà via te dotrei setemènes. N auter argoment de gran emportanza l é chel de la scomenzadives outes ai joegn, con n projet che à chela de scutèr l pensier de la neva generazions de la comunanzes de mendranza, dintornvia sia dimenscion de identità e sia vida de la palesèr, che l é stat portà dant da Elisabetta Sovilla.

Retrac del Ofize Stampa

Traduzion di Servijes Linguistics e Culturèi del Comun general de Fascia

(cdt)


Immagini