Mercoledì, 29 Gennaio 2025 - 14:47 Comunicato 173

Traduzione in cimbro
40 tzege Konferéntz von zungmindarhaitn, dar Marchiori: “Bichtege tème vor haüt un vor di djar boda khemmen vor di ünsarn kamöüschaftn”

[Cimbro] Pittar vorzitzarung von provintziàl asesór vor di politike vorz gehaüs, schatz un demanio, un zo macha khennen di Autonomì, Simone Marchiori, azpe vortretar von vorzitzar vodar Provìntz Maurizio Fugatti, iztase gehaltet an erta atz 28 von hoachnach, in setz palatz von Dante Platz da 40 tzege Konferéntz von zungmindarhaitn.
’Z hatta genump toal di diridjénten von Dianst vor di zungmindarhaitn un auzantn sachandarn Elisabetta Sovilla un, vo baitom, dar redjonàl asesór Luca Guglielmi, darzuar vil åndre vortretar von stòregen zungmindarhaitn kamöüschaftn, zbisnen disan mearare aministratör un di vortretar von Comun general de Fascia un vodar Union Generela di Ladins dla Dolomites, schual diridjéntn, toalnemmar von fervaltungsrat con kulturinstitüt un di toalnemmar vodar Autoritét vor di zungmindarhaitn.
“Disar iz a momént zo reda pittnåndar nèt lai übar di prodjèkte zo macha auz pan djar, ma vürzostèllanaz bia vürzovüara ünsarne autonomìan un baz zo tüana pitt ünsarn kamöüschaftn in di djar boda khemmen, bichtege tème boda ågian ’z lem sèlbart von zungmindarhaitn”, asó hatta khött dar Marchiori.
Conferenza Minoranze - Assessore Marchiori [ Veneri - Archivio Ufficio Stampa PAT]

An earstn izta khent khött bia innzotoala in provintziàl Font vor di zungmindarhaitn un di politike zo schützase un zo machase khennen pezzar, übarhaup vor bazta ågeat djornél, informatziong un asó vort in di zungen von mindarhaitn, vürvüarante prodjèkte zo nützase hèrta mearar saiz in di lentar von drai kamöüschaftn saiz auz. Di Provìntz hatt untargelekk 657.121,05 euro auzohalta di informatziong un vor prodjèkte un initziatìvan zo schütza un vürzovüara di ètnischen, kulturàl un linguistìk khennzaichan von ladinar, möknar un zimbar fölk un darzuar auzohalta di arbatn von Comun General de Fascia, asó azpe da auzmacht daz provintziàl gesetz. Ettlane di vorlegom boda soin khent vürgelekk von kamöüschaftn un von lånt institutziongen, zbisnen disan mearare sachandarn vor di komunikatziong, saiz djornél, saiz radio un televisiong, ma darzuar o prodjèkte zo linrna dise zungen in djungen, prodjèkte pensàrt übarhaup vor di schualn.

Ma hatt o geredet vodar vorlegom åzonemma da européan Kart von redjonàln un mindarhait zungen, boda zoaget in schütz von européan Rat vor di zungmindarhaitn. “Dar sèll vo haüt iz an earstar tritt: daz sèll bodaz paitet iz draurenda garècht un nemmen an bege bodaz vüart zuar an grözarn schütz zo geba in zungmindarhaitn” hatta no khött dar Marchiori, boda hatt o khött bia ma sait gelekk pinn dianst zo zoaga di österraichegen kanél Orf 1 un Orf Sport in alle di lentar vodar Provìntz, boda bart åhevan di bochan boda khemmen. An åndadar bichtegar tèma iz dar sèll von initziativan vor di djungen, pittnan prodjèkt boda gitt ’z bort in naüng djeneratziongen von zungmindarhaitn, übar bia da höarnse un bia da zoangse, a prodjèkt augelekk vodar Elisabetta Sovilla.

Foto von Prèss Åmt

Übarsetzt von Schaltarle vor di zung von Toalkamou vodar Zimbar Hoachebene

(cdt)


Immagini