S nai puach va der Rosanna Cavallini kimmp vourstellt kan Filzerhof en de 14 van heibeger
Zoa’, korb, packl: kurza gshichtn va baiber as en be
Traduzione in mòcheno
[Mòcheno] No s puach Le maestre, de Rosanna Cavallini keart um za kòntarn s lem ont de òrbetn van baiber va doing jor pet en puach “Zoa’, korb, packl”. Dòs nai puach klòfft van baiber as va òrbet sai’ sa gòngen za hòndln. S puach mòcht an unterschid zbischn de baiber as verkaft hom dinger no de ben ont de seng baiber as gòngen sai’ vort za òrbetn. De Ciòde ont de baiber as tettn hom de kinder van òndern, zan paispil, hom nicht varkaft, ober de hom u’trong s sai’ laib ont s sèll as de guat gaben sai’ za tea’. De doing baiber sai’ toal kemmen van an fenomen va ausbònder as bòlten gami’t hòt de sozialet gschicht va mearer gamoa’schòftn.
Durch untersuachn, kuntschòftn ont gschichtn van lait, s puach Zoa’, korb, packl gip lai bider stimm en de doing baiber no de ben, as guat gaben sai’ za mòchen auser kemmen van a neat eppes guats. Dòs puach ist schea’ tschrim ont pòckt vort, s bill nèt sai’ lai a gaschenk en de òrbet van baiber as vort va haus gòngen sai’ za hòndln, ober s ist gor eppes bichte ver òlla za tea’ nèt vergèssn s sèll as gaben ist.
S hòndln van krumer va der bersntoler gamoa’schòft ist gaben an òrbet as hom envir trong s mearest lai de mander. S hòt gahòt gor an ettlena baiber schubet no en zvaite bèltkriag, benn as de ermeket hòt se mear galòt hearn, as gòngen sai’ en de sudtiroler telder za hòndln. Der trèff ist en eirta as de 14 van heibeger um òchta ont a hòlbs zobenz kan Filzerhof en Vlarotz. De schraiberin bart klòffen per de viareren van Bersntoler Kulturinstitut Claudia Marchesoni. Zòmmen pet de vourstell van puach bart men kennen sechen gor s toal va der austell “Zbischn gschichtn ont birklechkait. Giuseppe Šebesta ont s Bersntol” as ist kemmen augarichtn as de teitsch van museum Filzerhof.
Ibersetz van Bersntoler Kulturinstitut
(lt)
Immagini
