Di trèff vodar boch soin khent vürgelekk von Andrea Nicolussi Golo von Schaltarle vor di zung von
Toalkamoju vodar Zimbar Hoachebene.
Erta 21 bintmånat di sèkse in tages, dar Ermenegildo Bidese vodar trianar Universitét un vorsitzar von Bizzkomitàtt von Kulturinsitut bart ren übar bia sidar hèrta ditza taütsches fölk habe gelebet tortemìtt dar natùr un habe getoalt pinn vichar di etzan un di beldar boz hatt gelebet.
An mitta atz 22 von bintmånat di sèkse in tages, bartz trèffan in Alessandro Anderloni, boda hatt augelekk in Filmfestival vodar Lessinia, kontàrn da schümma stòrdja von “Faff von Khestpuachan” ‘z lem von don Alberto Benedetti, nåsuachar, håndlar, boda hatt studjàrt di pèrng un soine laüt, pegaistar mearar afte natùr baz afte sachandarn vodar khirch.
An fintzta atz 23 von bintmånat, hèrta di sèkse in tages, barta soin protagonìst di poesia in an trèff zbisnen zungmindarhaitn. Da ladinar dichtaren Roberta Dapunt bart lesan atz belsch un ladinar zèrte soine gedicht von puach “Di earde mearar baz dar hümbl” auzgètt vo Einaudi in di “Collana Bianca” un dar übarsetzar Andrea Nicolussi Golo, bodase hatt übarzetz atz zimbar ’z djar 2023 pittnåndar pinn Toalkamòu bartze lesan in soinar muatarzung. Ombrómm da zimbar zung iz bidar geplüant schraibante zuargebante asó in vil laüt zo magase khennen, pitt se barta soin di Patrizia Cordin vodar trianar Universitét.
An vraita atz 24 von bintmånat vor di viare sin di sèkse in tages di Mariluisa Nicolussi Golo bart untarhaltn di khlumman, ma nèt lai se, pinn zimbarn stördjela, stördjela boda parìrn khemmen vonar åndarn bèlt, a bèlt guat zo lega panåndar daz sèll boma sek pinn sèll boma nèt mage seng, guat zo pinta pittnåndar
mentsch un natùr.
Alle di trèff bartnse haltn in puachgeschèft Ancora (Artigianelli) in bege S.Croce 35 ka tria. Vor da gåntz boch bartma mang khoavan di libadarn von zimbarn un aftaz zimbar, khennen a kultùr boda mage gIan vorlórt in bintsche zait. Ombrómm “aniaglana bòtta boda geat vorlórt a zung saibar alle a pizzle ermar” azpe da iz khent khött vo berda hatt geredet.
Übarsetzt von Schaltarle vor di zung von Toalkamou vodar Zimbar Hoachebene
Da obar gekhluppet dar progråmm
Foto un pildar von Prèss Åmt
Download pildar un interviste da: https://tinyurl.com/5bbdvjrh
