Dar Thomas Doss iz gebortet ’z djar 1966 atz Linz un hatt studjart in Konservatorio Bruckner diplomarantese in faif, kompositziong un orkèstra direktziong dena izzar no gånt vür zo studjara in Mozarteum vo Saltzburg, in di Musìk Universitét vo Viena un in Konservatorio vo Maastricht. ’Z djar 1987 hattar gebunnt in konkors vor Orkestra Direktziong vodar “Wiener Kammerorchester” un ’z djar darnå hattar ågeheft azpe dirèktor in “Konzerthaus vo Viena”. Vo 23 djar izzar khent ågestèllt vodar Sinfonische Statt Orkestra Quedlinburg azpe dar djüngarste orkestra dirèktor von Taütschlånt. Soi arbat haltet inn opere lirike, orkestral musìk, khåmmar musìk, kòre un musike vor solistn un apze kompositor vor da sinfonische orkestra vo plasstrumentn, dar Doss iz ummdar von musitzistn boda khint mearar gespilt in di bèlt. Profesór vo direktziong vo orkèstra in Konservatorio Claudio Monteverdi vo Poatzan von djar 2011 sin ’z djar 2016 dar Doss nimp toal in ettlane djurian vo konkorse.
Da statt bånda vo Wilten nimp in nåm von eltarste stattviartl vo Innsbruck bodase vinnt in sud vodar statt untar in Berginsel, raich pitt stòrdja un traditziongen. Di bånda iz khent augelekk ’z djar 1650 – an earstn iz gest lai a ummana von vil bånde vo khirch boda soin khent augelekk in di sèlln zaitn. Aftn funeràl von Andreas Hofer soinda gest lai 13 musitzistn, haüt soindara schiar 65 alle musìk pegaistar. Dòpo in zboate bèltkriage, di bånda iz vil gekreschart pinn dirèktor Sepp Tanzer, bodase hatt gemacht khennen in gåntz Österraich un in auzlånt un hatze gemacht khemmen an sinfonische orkèstra vo plasstrumentn. Pinn Kapellmeister Michael Stern, Hans Toifl, Peter Kostner un Raimund Walder, boda vüart di "Wiltener" von djar 2020 vort, di statt bånda iz khent a baispl vor di österraichege musìk vor plasstrumentn. Darzuar zo faifa in di khirchan vor di miss un auz, dar kontzèrt von långez ("Wilten Festival") un di “Feuerwerk vo musìk vor plasstrumentn” boda khint gemacht auz di earstn von djar soinz di hauppünkt vo dissaarn groaz sinfonege orkèstra vo plasstrumentn.
Übarsetzt von Schaltarle vor di zung von Toalkamou vodar Zimbar Hoachebene
