Venerdì, 30 Giugno 2023 - 14:12 Comunicato 1962

Traduzione in ladino
Vegn endrezà n coordenament di sic e elemenc Unesco en esser tel Trentin

L lo condusc l vizepresident e assessor al ambient Mario Tonina

I é tropes i sic e i elemenc del Trentin che à ciapà l recognosciment del Unesco, l Organisazion de la Nazions Unides per l’Educazion, la Scienza e la Cultura. L è stat recognosciù tant i gropes de monc dolomitics che fèsc pèrt de la Dolomites patrimonie de l’Umanità Unesco, recognosciment ciapà del 2009, che vèlch catedra de la Università scrita ites tel program Unesco Chairs. La Jonta provinzièla, co na delibera portèda dant dal vizepresident e assessor al ambient Mario Tonina, l à metù a jir n coordenament per favorir na colaborazion percacenta anter i desferenc setores de l’Aministrazion provinzièla e na sinergia maora anter la Provinzia e i desferenc enc e istituzions touc ite, acioche la istituzions competentes a livel nazionèl e internazionèl les se confronte. Coordena l projet l assessor Tonina, che l à la competenza sul projet “Dolomiti patrimonio UNESCO” (con delega del sorastant general del Dipartiment competent). Fèsc pèrt del projet dantdaldut i raprejentanc di sogec enciarié che gestesc i sic e i elemenc che l é tel Trentin, recognosciui tel ambit di programes Unesco. L Servije Svilup Sostegnibol e raions stravardé l se tol su l lurier de canzelaria per l coordenament.

Aldidanché te la provinzia de Trent l é stat recognosciù dal Unesco chisc sic e elemenc:
- Dolomiti Dolomiten Dolomites Dolomits, scrites ite del 2009 te la lingia del Patrimonie mondièl Unesco;
- Sic preistorics con palafites te la cedena de la Èlpes, scrit ite del 2011 te la lingia del Patrimonie mondièl Unesco;
- Adamello Brenta, scrit ite del 2008 te la Rei mondièla di Geoparches Unesco;
- Resserva de Biosfera Èlpes Ledrensi e Judicaria de la Dolomites sul Garda, scrita ite del 2015 tel Program Unesco Man and Biosphere;
- Catedra Engineering for Human and Sustainable Development, Università di Studies de Trent, scrita ite del 2011 tel Program Unesco Chairs;
- Catedra on Anticipatory Systems Università di Studies de Trent, scrita ite del 2013 tel Program Unesco Chairs;
- Club Unesco de Trent, scrit ite del 2011 te la Federazin Talièna de la Sociazions e Club pre l Unesco.

Del 2021 l é stat portà dant la domana de recognosciment del Club per l Unesco de Lavaron Forteza Belvedere-Gschwent e Mont Zimbra.

Per chel che revèrda i sogec de riferiment per la gestion di bens Unesco, che l é sul teritorie provinzièl: la Provinzia Autonoma de Trent per la Dolomites Unesco, gestida tras la Fondazion Dolomiti Dolomiten Dolomites Dolomitis Unesco de chela che la Provinzia é sozio fondador; la Soraintendenza per i bens culturèi per la pèrt trentina di Sic preistorics con palafites te la cedena de la Èlpes; l Parch Naturèl Adamello Brenta per l Geoparch Adamello Brenta; l Bacino Imbrifero Montano (BIM) del Sarca per la Resserva de Biosfera de la Èlpes Ledrensi e Judicaria de la Dolomites sul Garda.

Per chel che revèrda la gestion de la Catedres Unesco e del Club Unesco, en esser te la provinzia de Trent, la realtèdes de referiment l é i respetives enc e sociazions.

Vedù che tel Trentin l é più sic e elemenc recognosciui con sie sogec per la promozion e gestores, l é vegnù fora l’oportunità de meter en esser n spazie de confront e riflescion en cont a la desferenta esperienzes, per meter a jir strategies dessema, e aer l met de lurèr fora projec duc a una. Chest coordenament l é stat metù a jir en vender ai 16 de jugn da la Jonta, che per sia atività l’arà l didament da man de la Scola per l teritorie e l paesaje de TSM.   

Traduzion di Servijes Linguistics e Culturèi del Comun general de Fascia

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: