Mercoledì, 13 Gennaio 2021 - 13:01 Comunicato 75

Traduzione in ladino
Varianta Cianacei-Ciampedel, scontrèda anter l president Fugatti e la aministrazions de comun

La previjion lurèda fora da la Provinzia la comporta na speisa de presciapech 70 milions de euro

L nef projet de varianta Cianacei-Ciampedel l’é stat l’argoment prinzipèl de la scontrèda anter l president Fugatti e la aministrazions de comun retes dai ombolc Giovanni Bernard (Cianacei) e Ivo Bernard (Ciampedel). A la scontrèda à tout pèrt ence l conseier provinzièl Luca Guglielmi e i sorastanc generèi del Partiment infrastrutures e trasporc Stefano De Vigili e dell’Agenzìa provinzièla per la operes publiches Luciano Martorano.

Ai raprejentanc istituzionèi del teritorie ge é stat metù dant na previjion de projet che la perveit de spartir la varianta te doi unità funzionèles. La pruma la revèrda la zirconvalazion de Cianacei e la seconda chela de Ciampedel col coleament ai impianc portamont de Rodela. Su la costion, l capo de l’esecutif l se cruziarà de jir tel fon de la costion per arjonjer sencajo l finanziament.
La mudazion del projet la é stata studièda fora da l’Agenzìa per la operes publiches per favorir la sostenibilità economica de la pruma pèrt de intervent, per chela che l’é pervedù na speisa de presciapech 70 milions de euro e la perveit n toch de strèda de zirca 1,5 chilometres te tunel e etres toc de strèda alalèrgia per zirca 600 metres.
La aministrazions de comun, en cont de la proponeta, che aboncont la vegnarà vardèda fora più tel fon dai enc del teritorie ence aldò de la documentazion portèda dant dai ofizies de la Provinzia, les à dat jù na pruma valutazion positiva. Aldò de la osservazions che ruarà ite, Piazza Dante lurarà fora l projet co l’obietif de cordèr la neva soluzion de viabilità col paesaje, l’ambient e l turism.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)


Immagini