Giovedì, 03 Novembre 2022 - 13:14 Comunicato 3414

Traduzione in mòcheno
U’heiven van PNRR ver Palai en Bersntol, u’ganommen s oa’ne mitòrbet zbischn de Provinz ont de Gamoa’

S sai’ kemmen austoalt de òrbetn zbischn de zboa Dinstn ver za riven de ziln vourtrong van programm ver za stitzn s Bersntol

U’ganommen va de Provinzal Junta s oa’ne mitòrbet kòrt as mòcht u’vongen sa envire trong der projekt zuazolt van PNRR as de kròft va de minderhait: bider mòchen lem s dorf as taitscha burzn hòt en Sud van Alpn, as zan mearestn kimmp enteressiart Palai en Bersntol ober s tschbinnt en stitzung van gònze Bersntol. S ist an dokument bou as de Provinz ont de Gamoa’ sai’ gamiast za envire trong der zil vourtschbunnen oa’n zbischn der ònder.
Der kontratt gib s rècht en President va de Provinz za meing unterschraim de aktn van òrbetn ont gip en UMST zòmmregiar van lokaln dinstn, lònt ont pèrng politik, s gamiast za regiarn ont hèlven de Gamoa’ va Palai en Bersntol ver za u’heiven der projekt.
“der projekt hòt enzint, abia as men boast, a toal òrbetn as belln mòchen verpessern vernaiern ont stitzn s birtschòft ont s guat stea’ van lem van lait turch òrbetn as sai’ guat za leing zòmm der kultural ont umbèlt bèrt pet de naia teknologi ont naiekeitn ver za vongen u’ za gem an ònders lem en lònt va Palai en Bersntol ont en gònze Bersntol. Pet de doi oa’ne kòrt ber barn gahasse u’heiven der PNRR turch de òrbetn as ber miasn organizziarn ont regiarn de Provinz ont de Gamoa’ òll oa’s pet de sai’na òrbetn. De Provinz bill aa u’stelln ver de zait van projekt, zboa lait ver za mithèlven” asou hòt er klòfft der president va de Provinz der Maurizio Fugatti.
Scorcio di Palù del Fersina, sullo sfondo la Chiesa di Santa Maria Maddalena [ Archivio Servizio minoranze linguistiche PAT]

En oa’ne kòrt sai’ tschrim derzua en sèll as ist gamiast za mòchen zòmm no en de prinzipn van PNRR, de sòchen as de zboa unterschraiber miasn sèlber mòchen, s sèll as hèlven barn de lait as u’stellt sai ver de projektn, s drauschaung as sèll kemmen rècht gamòcht, s gamiaste soch za tea’ innschraim en de datnpònk REGIS va de General Ragionier van Stòtt ont zan leistn s schraim van gèltdatn.
Abia as men boast s gèlt gem pet en dekret van kultur Minister ist va 20milionen va euro, ver za u’heiven an programm va iber 30 òrbetn, de mearestn regiart va de Autonome Provinz va Trea’t no en rècht za tea’ s ver en Special Autonome Statut va de inger region, ont òndra òrbetn sèlber va de Gamoa’ va Palai en Bersntol.

De Provinz, turch en oa’ne kòrt va hait verhoast za gem de gònze hilv as men bart prauchen as de techniker, bisschòft, organizzazion ont operativ sait ver za u’heiven ont mòchen der projekt pet en zuanemmen aa van strumentaln Dinstn ont va de Società in house. en glaiche vurm kemmen zuaganòmmen en projekt de Tsm ont Trentino Marketing ont a toal Dinstn (S.O.V.A., Paundinstn ont unterstitzn van umbèlt, Dinst ver de beng ont van ponhoff, Dinst van zivilnòrbetn ont Dinst ver de umbèlt òrbetn va APOP, Dinst ver de u’stelltn, u’lear ont van sistemfunzionen) ont der hòntbèrk Dipartiment, hòndlbèrk, enviretrong, sport ont turismus. A bichtega figur ist gabiss der Bersntolerkulturinstitut ver de projektn as de sproch ont kultur va de minderhait.

Ver sèll as keart s aunemmen va zboa techniker lait ver za stea’ no en projekt, derzua en de hilf as bart gem de Provinz pet de sèlbern u’stelltn va de amministrazion, de dòin nain professionaln figurn barn kemmen praucht ver de òrbetn va progettazion, regiar va òrbetn, arkitektur dinstn ont va ingegniarn, collaudi ont ver de kommissionen ver za au’nemmen de bèrkn, geologichen ont sismiche suachen ont òrbetn ver arkeologesche suachen ont òndra techniker-operativ sochen ver an iatn projekt zuazolt van PNRR.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)

(cdt)


Immagini