Di reklåm iz augelekk von Ministér vor di Gesunthait pittnåndar pinn Dipartimént vor da didjitàl vornaügarung von Vorsitzarung Rat un pinn Ministér vor di ekonomì un finåntz, geschützt von Redjongen un von autonomen Provìntzan un hatt azpe zil daz sèll zo macha bizzan in pürgar in vèrt boda mage khemmen zo haba ’z Eltrònesche Sanitèr Heft, baz ma bill tüan darmìtt, bazta drinn geat un di rècht boda di pürgar sèlbart håm aftz soine sèlbart date. Übarhaup vor bazta ågeat disan lest punkt, asó azpe da hatt gevorst garade dar Garante privacy, khinta zuargètt in pürgar nèt zo lazza innschraim date odar briavan boda soin khent augenump vor atz 19 von madjo 2020. Von sèll tage vort alle di date un di briavan un allz bazta ågeat dar gesunthait boda khint gètt von Natzionàl Sanitér Dianst bart khemmen inngelekk in ESH in automatisch.
Zoa azta di pürgar mang håm rècht zo oponrase dar Ministér vor di Gesunthait hatt augelekk a funktziong afte natzionàl plattform online von Sistema Tessera Sanitaria (TS) https://sistemats1.sanita.finanze.it/portale/area-riservata-cittadino boda bart vürgian sin atz 30 von prachant. ’Z stianda auz di didjitàln briavan boda sa soin gevazzt aftz ESH boda soin khent zuagètt garade von mentsch un di rèpetze von spetziariarn un von spetzialistn. Dòpo atz 30 von prachant 2024 bartz nemear soin möglich inngem opositziong zo vazza aftz ESH di date boda soin khent augenump vor atz 19 von madjo 2020.
In sistema TS makma drinn gian durch – SPID (Sistema pubblico di identità digitale), CIE (carta d’identità elettronica), CNS (Carta Nazionale dei Servizi) – odar innlegante in augelnummar un in nummar vodar sanitér kart un in tage bose skadart, odar azma nèt hatt in augelnummar in koditze STP (Straniero Temporaneamente Presente) un in tage bodar iz khent auzgelatt. Azta dar pürgar hatt nèt modo zo maga inngian alumma in sistèm TS magar allz ummaz inngem opositziong gianante, dòpo z’soinase gemeldet, in ummaz von schaltarla Apss. Z’soina geschützt vo Apss iz genumma årüavan in unatzege nummar 116117 (lai vor Primiero dar nummar iz 800 016 017), boda bart ånemmen di vorsch. Dar pürgar bart dena khemmen bidar ågerüaftt von nemparste schaltarle zo legase dakòrdo vor benn ma hatt liabar vennense.
Inngem opositziong zo vazza aftz ESH di date un di briavan boda soin khent augenump vor atz 19 von madjo 2020 hatt khummane konseguentzan aftaz sèll boma bart håm mångl vor di gesunthait, ma di date boda soin khent augenump pellar baz in sèll tage bartn nèt mang khemmen gesek von dökhtür un von åndarn laüt boda arbatn in di sanitér, un asó bartnsa nèt mang bizzan allz dar sèll boda ågeat dar gesunthait von mentsch, un bartnda mengln sachandarn boda magatn soin nützlich zo magaz kuràrn pezzar.
Di reklåm iz khent gemacht åhevante von stempl un von matardjéldar boda hatt zuargelekk dar Dipartimént vor da didjitàl vornaügarung vodar Vorsitzarung von Ministér Rat legante darzuar alle di informatziongen boda ågian dar autonome Provìntz vo Tria.
Zo haba mearare informatziongen makma vorsan årüavante in nummar 116117 (lai vor Primiero 800016017) odar gianante afte link
• Ministero della salute
• STS - Sistema Tessera Sanitaria
• Provincia autonoma di Trento
Spot
Übarsetzt von Schaltarle vor di zung von Toalkamou vodar Zimbar Hoachebene
