L president de la Provinzia autonoma de Busan l ge à dit develpai al president trentin del Euregio per la colaborazion percacenta di ultimes doi egn e per sie lurier. Col mot “Jir sorafora la seides” va inant la cooperazion sot la presidenza sudtiroleisa. Tel program l é l endrez de projec neves per arvejinèr la region a sie sentadins, per meter adum la persones e apontin per jir sorafora la seides. Dantdeldut, l lurier de duc envers obietives a una con n orientament europeèn e na atenzion particolèra per la popolazion del Euregio. La sostenibilità, tant dal pont de veduda sozièl che ecologics e economics, resta la endesfida più de prescia; l é la vijion de un Euregio che dèsc l met de fèr vegnir fora un projet de duc aldò del Tirol storich: per l president nef un projet de la jent, no de la politica.
L capitan del Tirol l ge à dit develpai al president trentin del Euregio che va fora per la colaborazion bona, stata te sie doi egn de presidenza, sotrissan che l é stat portà inant zeche che l é jà stat sperimentà e auter da nef l é stat metù a jir, fajan referiment a la colaborazion de fazion stata per l endrez del Campus Euregio a Dispruch, al concors de scola “Euregio fèsc scola” e al EuregioLab, olache l é stat portà dant proponetes per scomenzadives per duc tel ciamp de l’energia tel Forum europeèn de Alpbach. La ativitèdes e la scomenzadives les serf per arvejinèr la persones de duta doi la pèrts del Prener e l Sudtirol l podarà a chesta vida renforzèr e miorèr amò de più la cooperazion.
Via per l dadoman, l president che l é jit fora, l ge à portà dant a la Jonta la ativitèdes del Euregio 2023. L é stat donca aproà l program de lurier per l 2024. I doi egn 2021-2023 i se à serà su sot l mot “L Euregio l é joen”, na vida de dir che vel meter al luster i sacotenc projec e la sacotanta scomenzadives portèdes dant da la generazions neves, col renforzèr amò de più l Euregio e col sotrissèr la vejinanza ai sentadins di trei raions. Col passaje de presidenza dal Trentin al Sudtirol, l Euregio l seghitarà a se dèr ju, per i doi egn che vegn, te endesfidesdes de gran atualità: dal mudament del tempram, ai besegnes di sentadins, da la mencianza de lurieranc califiché al balanzament sozièl, da la valiva oportunitèdes a la gestion del patrimonie del bosch e de la besties magnacèrn. No vegn lascià da na man la cooperazion ti ciampes de la Protezion zivila, de la cultura, del imprenditoria, del turism e del sport.
L secretèr generèl che l é jit fora l à recordà che chesta giornèda no la raprejenta demò la fin de la pèrt del percors trentin, ma ence l scomenz de chel de la Provinzia autonoma de Busan. L à ence palesà sodesfazion per i doi egn passé e soraldut per i ultimes meis, olache l é stat portà a compiment sacotanta ativitèdes. A la presidenza neva ge vegn consegnà na arpejon emportanta, che l’à metù al luster e l’à moscià più joen l Euergio: a la sacotanta endesfides che podarà entravegnir ge vegnarà fat front tras la colaborazion e la spartijon di obietives coi etres raions.
L à saludà i membres de la Jonta e de la Radunanza ence l ombolt de Molveno. Via per l domesdì, enlogia l lech de la zitadina i arleves e i istrutores di Studafech del Distret de Mezlombard i à fat manovres e la giornèda la se à serà su co la ciantia per talian e per todesch del In a la Legreza, In de l’Union europeèna, da pèrt di scolees de la scola populèra “Luigi Nicolussi” de Molveno, desche segn de amicizia sorafora la seides che caraterisea l’Euroregion enscin da canche la é stata metuda su.
Fotoservije e video per endrez del Ofize Stampa
Traduzion di Servijes Linguistics e Culturèi del Comun general de Fascia
