Zbisnen in bichtegaresten pünkt vodar vürlegom, hatta khött dar dk. Ferro, soinda dar darkhenn vo drai sanitér distrikt boda håm azpe zil in sèll zo koordinara, vürzovüara un zo macha arbatn pittnåndar di profesionìstn. Di ziln: nemparn in pürgar di dianst boda soin in di lentar un di sèlln von ospedeldar, ånemmen gåntz ’z mentsch boda hatt mångl, machan azta di sanitér dianst khemmen z’soina vor alle gelaich, destarn di protzedurn un zuargem azta di sachandar khemmen auzgemacht garade in di lentar. O bichte barta soin di pintom boda bart khemme z’soina zbisnen ’z Åmt vor di sanitér dianst un alle di åndarn boda arbatn vor di sanitét in Provìntz, di pintom pinn lentar un pittar nètz von ospedeldar. Aniagladar ospedàl von tal bart soin darkhennt azpe hauppunkt vor zèrte sachandarn.
Dar grunt tema, hatta no khött dar Ferro, iz gem vèrt in sanitér arbatn boda khemmen gemacht ummar in di lentar un allz daz sèll boda khint getånt vor di gesunthait.
Vor daz sèll bartma süachan zo legase panåndar pinn doktür von laüt, pinn sèlln von khindar un pitt alln sotziàl-sanitér profesionìstn, un darzuar natürlich pinn pürgar. Daz sèll boma bart süchan zo tüana in di djar boda khemmen iz zuarziang di profesionìstn dar sanitét.
Aftz disa vürlegom izta khent vil draugeredet, ’z hatta genump ’z bort vor earst dar pürgermaistar vo Rovrait Francesco Valduga boda hatt gedenkht bazta hatt khött dar Cal afte distrikt ma dar o khött ke daz sèll boda iz khnet vügelekk in trèff iz eppaz mearar un pezzar. Dar Valduga hatt o geredet aftaz sèll boda mang tüan di Kamöündar vürzovüra in gåntz prodjèkt, khödante vodar preventziong boda mocht khemmen gemacht un schupfan azta khemme gemacht a gesuntz lem. An lestn hattar geredet von laüt boda soin mångl un von gèlt, untarstraichante bazta ågeat di arbat kontrètt.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
